Mizoram PWD hnuaia hna 48 zinga Pahnihah revised estimate siam a ni

PWD Project Division pathum hnuaia Mizoram hmun hrang hranga hna thawh 48 zingah, a tira agreement amount, a hnua tihdanglama revised exstimate siam pahnih a awm. PWD hna hrang hrang 48-te chu cheng nuai 100 chung lam man vek niin, a vaiin nuai 18,741 chuang man a ni a, a thawktute chu Mizo vek an ni.

PWD hnuaia hna ṭhenkhat chu tun hnaia mite a ni a, ṭhenkhat erawh kum 15 liam tawha mite a ni thung. Project Division pathum hnuaia building sak hna hrang hrang 48 zingah hian Project Divison-II hnuaia hna pahnih chu revise estimate siam a ni, a dang 46 erawh revise estimate siam a ni lo.

Vanglaini chuan RTI Act hmangin PWD-ah in hrang hrang, cheng nuai 100 chung lam thawktute leh an thawh dante a zawt a; agreement amount revise a nih leh nih loh te, hna thawh hun chhung chhunga sak zawh a nih leh ni lohte leh contractor hming leh a kaihhnawihte a zawt a ni.

Zawhna chhannaah hian, hna thawh hun chhung bithliaha in sak zawh theih loh chhan zawhna chhanna zingah SPIO ṭhenkhatin an chhanna tarlan dan a inang lo nual. Ṭhenkhat-in hun tiam chhung thla bi chiah an tarlan laiin, ṭhenkhat chuan hun tiam chhung thla bi tarlang chungin a huna zawh loh chhan ziakin an tarlang.

PWD Project Division-I hnuaiah cheng nuai 8,720 chuang man hna panga thawh a ni a; sum ruahman tamna ber chu New Secretariat Complex-a High Court building tur sakna niin, cheng nuai 4,623.99 man a ni. High Court building tur hi North East Consultancy Services (NECS) sak a ni a, thla 36 chhunga zawh tura tih niin, hna an thawk mek. NABARD office, New Secretariat Complex-a mi pawh nuai 934 chuang ruahman niin, V Sangpuia, Lunglei Chanmari-in a thawk a, thawh mek niin, thla 18 chhunga zawh tura tih a ni.

Tuikhuahtlang, Aizawla PWD Chief Engineer (Highway) pisa tur sak chu thla 15 chhunga zawh tura tih a ni a, agreement amount chu nuai 614 niin, V Sangpuia, Lung-lei Chanmari-in sak a ni. Chaltlanga SCERT Multipurpose building tur sak mek chu thla 12 chhunga sak zawh tur niin, contractor A Pachhunga, Mamitin a sa a, agreement amount chu nuai 157 chuang a ni. New Secretariat Complex-a District Court building tur pawh thla 36 chhunga zawh tur niin, contractor R Sangkhuma'n a sa a, agreement amount chu nuai 2,398 a ni.

PWD Project Division-II hnuaiah kum 1999 aṭanga kumin thlenga in sakte an tarlang a, chu'ng zinga pahnih - Kolasib-a Treasury Office, contractor CT Mawia sak leh Mamita Treasury Office, contractor Suikama sakte chu revise estimate siam a ni. Project Division-II hnuaiah hian kum 1999 aṭangin hna 38 thawh tawh a ni a, a vaiin nuai 9,446 chuang man a ni.

Kolasib-a Treasury office sakna agreement amount chu Rs. 99,00,000 man ni mah se, revised estimate chu nuai 136.20 a ni a; Mamita Treasury office sakna agreement amount chu Rs. 1,10,80,000 niin, revise estimate chu nuai 142.34 a ni thung. Hna pahnih hi thla 12 chhunga zawh tura ruahman a ni a; revise a nih chhan chu agremment siam a nih laia Schedule of Rate (SoR) an hman leh hna an thawh tak tak dawna SoR thar 2013 siam a nih avangin revise a nih thu an tarlang.

PWD Project Divison-III hnuaiah hna chi hrang pathum a awm a, hna pakhat chu contractor pathumin an inthawh sem avangin a hlawm chuan hna pathum tihna a ni. Heng hnate hi office tur sak a ni a, cheng nuai 575.35 man niin, revise estimate a a awm lo.

Rabung damdawi-in (PHC), contractor VL Zuala, Electric Veng, Aizawl sak chu agreement amount nuai 106.43 a ni a, thla 10 chhunga sak zawh hman tura ruahman a ni. Thla 10 chhungin sak zawh a ni lo a, a huna zawh loh chhanah, 'A building hlui ṭhiah hian hun rei tak a awh vang a ni,' an ti.

Champhaia Power & Electricity department staff quarters pathum chu contractor pathumin an sa. Type-V building pakhat chu R Denghnuna, Dinthar, Aizawlin a sa a, agreement amount nuai 62.56 a ni. Type-IV pakhat chu Roenga, Republic Vengin sain, agreement amount nuai 42.03 a ni a; type-III building pahnih chu R Zokhuma, Durtlang Zotui Vengin sain, agreement amount nuai 58.81 a ni.

Champhaia P&E department quarters tur sak hna hi thla 10 chhunga zawh tura tih a ni a, mahse, hun tiam chhungin sak zawh a ni lo. A huna zawh hman loh chhan an tarlan chu, 'Labour-te an ram lamah an haw vangin hna a tikhaihlak a ni,' tih a ni.

Project Division-III hnuaiah vek hian New Secretariat Complex-ah Taxation department directorate tur sak mek a ni a, agreement amount chu agreement amount chu nuai 305.53 niin, thla 12 chhunga sak zawh tura tih a ni a, contractor F Sangkunga, Venghlui, Aizawlin a sa a ni.