Aizawl PS bulah MNYF-te an pungkhawm

Mizo National Youth Front (MNYF) chuan thu-chhuah siamin, an general secretary KC Lalthansanga chu Facebook group pakhata a thu post vangin police-in thu an zawtfiah tih an tarlang a; hei vang hian Inrinni khan Aizawl Police Station bulah an pung khawm.

MNYF tarlan danin, KC Lalthansanga hi July 22, Inrinni chhun khan Facebook group pakhata thlalak a dah leh thu a ziah vangin Aizawl PS-ah koh niin, thu an zawtfiah a; a thil post chu mimal intihhmingchhiatna a nih theih avangin thubuai siamsak theih a nih thu an hrilh a ni.

KC Lalthansanga police-in an koh avang hian MNF ṭhalaite lung-awi lo chu Aizawl PS kawtah an pung khawm a; KC Lalthansanga chu thu zawhfiah a nih hnua chhuah leh nghal a nih avangin buaina dang awm loin an ṭîn darh a ni.

MNYF thuchhuah chuan, MBBS zir tura Mizoram quota-a hnam dang dah tumna awm chu pawi an tih thu leh MZP huaihawta July 20, 2017-a Higher & Education Education Technical Wing pisa bula Mizo zirlaite’n duh lohna an lantirnaa zirlai tam tak an hliam chu pawi an tih thu a tarlang.

Police-te'n zirlaite kut an thlak leh kutthlak tura police-te thu petute an dem thu sawiin MNYF chuan, "Zirlai hliam zawng zawngte Mizoram sorkarin an inenkawl nan zangnadawmna an phu tâwk pe ṭheuh turin kan phût tlat a, hetianga insawisakna hi thleng tawh lo se kan duh," an ti. Zirlai hlau tlanchhe tawhte police-te'n ûm zui a, kut an thlak zui chu hriatthiam har an tih thu an sawi bawk.