Zemabawkah ruihhlo hâl ral a ni

Zemabawk Joint Action Committee (JAC)-in kumin chhunga an ruihhlo man tawh, Rs. 3,06,995 hû chu July 22, Inrinni khan an pisa kawtah an hâl.

Ruihhlo hâltu Zochhuana, Zemabawk Branch YMA finance secretary chuan, Zemabawk JAC-in hah tak leh rim taka thawk a, ruihhlo tam tham tak an man chu lawmawm a tih thu sawiin, "Hetiang zat man tur a awm hi a lungchhiatthlak hle a ni," a ti a; ruihhlo doa hmalakna thlawp turin kohhrante leh mipui a sáwm.

Zemabawk JAC-in ruihhlo an hâlte chu - heroin hawng 2, can 37 leh chhinsen 6; sap zu ûm 142; ganja kg. 7, Alprazolam mûm 63 leh dawidim fûn 2 a ni. Zemabawk JAC hian sorkar dan phal zat aia tam liquor card kawlte hnen aṭangin liquor card 96 an man bawk.