Hmeichhia leh naupangte venhimna chungchang zirho

MHIP general headquarters chuan July 22, Inrinni khan IPR directorate auditorium-ah kohhran hrang hrang hmeichhe pawl hruaitute leh Aizawla MHIP branch hruaitute pualin, 'Hmeichhia leh naupangte hmasawnna leh venhimna' tih thupui zirhona a buatsaih a; MHIP patron Lal Riliani khuallian a ni.

Lal Riliani chuan, khawvel a changkan ang zelin sualna pawh a pung zel tih sawiin, "Hmeichhia leh naupangte chunga hleilenna pawh a pung zel. Tun hmaa dan hriat loh vanga ngawih bopui ṭhin thil tam tak chu tun-ah chuan mipui mimir kan harh tawh avangin sawi chhuah nacháng kan hre tawh a, nasa lehzuala inziritirna kan neih a pawimawh a ni," a ti.

Naupangte chu nakkin lawka ram leh khawtlang hruaitu tur an ni tih hre lo nu leh pa tam tak an awm tih sawiin Lal Riliani chuan, "Naupangte hi Pathian hnen aṭanga kan rochan an ni a, mi pui-tlinga chher chhuah hi nu leh pate mawh a ni," a ti a; Mizoramah nu leh pa enkawl loh naupang, hnu-chham enkawlna hrang hranga hmuh tur an awm tam chu Kristian nih nen a inhmeh lo hle thu a sawi.

Mizo khawtlang nun chu inhnaih taka khawsaho, chhiat leh ṭhata inpeizàwn tel tel ṭhin a ni tih sawiin Lal Riliani chuan, "Heti tak maia vawiina kan rama naupang nu leh pa enkawl loh tam tak lo awm ta hi eng vang nge tih ngun taka a bul thûm aṭanga kan chhût a ṭul. Naupangte hian naupan lai hun nuam taka an hman hi an chanvo a ni a, chutiang kan siamsak thei lo a nih chuan nu leh pa ni tlak kan ni lo tihna a ni," a ti. Naupang chunga hleihlenna thleng ṭhin tihtawp a nih theih nan khawtlang, pawl leh sorkarte ṭan rual a ṭul thu a sawi bawk.

Seminar hi MHIP president Saipuii'n a kaihruai a; MHIP legal adviser Lalnunsiama, advocate-in Protection of Children from Sexual Offenses Act (POCSO Act) chungchang a sawi a; MHIP senior adviser Vanlalruati, SCERT lecturer-in 'Women's right' tih a sawi thung.