KHAWTHLIR

MUP-in thlawp
Mizoram Upa Pawl (MUP) chuan thuchhuah siamin, kum 2017-a Mizoram quota-a MBBS leh BDS zirtur thlannaa Chakma leh hnam dang pakhat an tel chu ṭha an tih loh thu an tarlang a, "Rem leilung fate humhalh nana MZP hmalakna hi kan thláwp. Mizo fate ngeiin MBBS leh BDS seat hi luah khat se kan duh," an ti. Ram leilung fate chanvo category-I a hnam dang dah an ni chu Mizo fate chanvo chuhsaknaah an ngaih thu an sawi bawk.

Thisen pe
Inrinni khan Synod Hospital tan Dinthar Branch KṬP-in thisen unit 31 an pe a, a petute mipa 24 leh hmeichhia pasarih an ni. Aizawl Civil Hopital-ah Bru Student Association, Aizawl-in unit 28, Khawbel Student Association-in unit 19 leh Zomi Innkuan-in unit 13 an pe bawk.

BEDC man
Champhaia Excise & Narcotics department chuan July 21, Zirtawpni khan Champhai Tourist Lodge bula Vaihmunah Myanmar zu BEDC fûn 550 (litre 385) an man a, a neitua hriat, Lalramenga (32) s/o HT Sanga, Champhai Electric Veng nia insawi an man bawk. Lalramenga hi Court-ah thawn nghal a ni.

Computer zirtir
DIET, Aizawl chuan an institution-a first semester zirlaite tan July 21, 2017 khan National Institute of Electronics and Information Technology (NIELIT) nen ṭang dunin computer orientation an buatsaih. Computer orientation course-ah hian Course on Computer Concepts (CCC) an zirtir dawn a ni.

NLUP sem
UDPA dept. chuan July 21 khan Thakthinga Zawlbukah NLUP 3rd leh 4th phase ṭanpuina an sem a, parliamentary secretary Lt. Col. ZS Zuala'n a hman pui a, ṭanpuina hi mi 595 hnenah sem a ni. Lt. Col. Z.S. Zuala chuan NLUP chu retheite dawm chhuahna tura sorkar hmalakna lian ber a nih thu sawiin, a zarzotute chu an sum dawn dik tak leh ṭangkai thei ang bera hmang turin a fuih.