UDPA leh Tourism department-te'n Aizawlah ropeway siam an tum

Urban Development and Poverty Alleviation (UDPA) department leh Tourism department chuan Aizawlah ropeway siam tumin hma an la mek.

Thu dawn danin, UDPA leh Tourism department-te'n Aizawla ropeway siam an tum hi a hrana project kal a ni a; remchang an tihna hmunah siam an tum an ni. Tourism department-in siam an tum chhan chu khualzin hîpna atan a ni a, UDPA department-in siam an tum chhan erawh chu mipui veivah (transportation) awlsamna atan a ni thung.

UDPA secretary Dr C Vanlalramsanga'n Vanglaini palai zawhna chhanga a sawi danin, UDPA-in Aizawla ropeway siam a tum hi ruahman dan chuan, Ministry of Urban Development kaltlangin Asian Development Bank (ADB) sum hmanga siam tum a ni.

Aizawl khawpui tâwt leh mipui veivahna awlsam zawk nan UDPA hian ngaihtuahna a séng ṭhin a, Ministry of Urban Development bultumin ADB pawhin Mizoram sorkar chu report, '8765 IND: Supporting Sustainable Urban Transport in Aizawl City' tih a siamsak tawh.

Ruahman ang chuan ropeway hi Ṭhuampui - Solomon’s Temple, Chawlhmun (km. 5.5); Ṭhuampui - Chief Minister's Office (CMO), Zarkawt (km. 2.4); Durtlang - Zemabawk (km. 7.5); CMO - Armed Veng leh CMO - New Secretariat Complex inkarahte siam tum a ni.

Dr C Vanlalramsanga chuan, ropeway siamna tura proposal an siam chu Ministry of Finance-ah an thehlut tawh a, Ministry of Finance-in thutlukna a la siam lo niin a sawi a; "A hautak a, sum sen zat a tam dawn a, tuna kan ruahman chinah pawh cheng vbc. 445 a ngai dawn a ni," a ti.

UDPA hnuaia Aizawla ropeway siam tur hian khawvela ropeway siamtu company lar Doppel­mayr Garaventa, Austria biak an ni tih sawiin Dr C Vanlalramsanga chuan, "Anni hi survey tiin Aizawlah vawi hnih vawi thum an lo kal tawh," a ti a; ropeway siam tuma an hmalakna chu an bawhzui zel a, mahse, hun a la duh rei deuha an rin thu a sawi.

Thu dawn danin, Doppelmayr Garaventa hian ram hrang 90 chuangah ropeway an siam tawh a, ropeway siamna hmun, a hralhna leh service pek theihna ram 35 chuangah an nei mek a ni.

Tourism department chuan Aizawlah ropeway pakhat siam an tum mek a, a siamna tur sum pawh an dawng tawh a, tunah hian an buaipui mek.

Tourism department hotute hnen aṭanga thu dawn danin, ropeway siam an tum hi Chaltlanga Tourist Lodge leh Durtlanga Synod Hospital bul inkarah a ni. Tourist Lodge bula station turah chuan Tourism department ram a nih avangin harsatna a awm lo a; Durtlanga station tura an ruahman, Durtlang Local Council ram emaw an tih chu Synod Hospital ram a nih avangin Mizoram Synod-ah hman an dil a, Synod hruaitute thu an nghak mek.

Tourism department-in ropeway siam an tum atan hian sum sanction awm tawh mah se, sum sen zat tur chiah erawh hriat theih a la ni lo tih an sawi a; power sub-station tê siam a ngaih dan leh ropeway station siamna hmun tur azirin sum sen zat tur a danglam thei tih an sawi a ni.