Chakma telh duh lo

All Mizo Medical Stu­dents' Union (AMMSU) ge­neral headquarters, RIMS, Imphal chuan thu­chhuah siamin, Mizoram quota-a MBBS zir tur thlan­na cate­gory I-a Chakma pali an tel chu ṭha an tih loh thu leh, chumi dodala MZP-te chetna chu an thlawp thu an tarlang.

AMMSU chuan, "Kum 2017-a Mizoram sorkar hnuaia MBBS, BDS leh nur­sing zirna seat awmah, MBBS zir tur zingah Chak­ma pali ngawt mai telh an ni hi ṭha kan ti lo a, ram leilung fate chanvo tur category I-a Chakma telh an ni hi pawi kan ti a, Mizo chanvo dik tak chhuhsaknaah kan ngai," an ti.

MBBS zir tur thlanna category I-a Chakma telh duh loa MZP-in an dodal chu ṭha an tih thu leh a tawp thlenga an thlawp dawn thu an sawi a; Mizoram sorkar chu tuna a kalpui tawhte a theih anga sût a, category I-ah ram leilung fa Mizo dik takte chauh dah tur leh Chakma-te telh tawh lo turin an phût a ni.