Chakma chungchanga hmalakna atan Duhoma'n Action Committee din a rawt

ZNP president Lalduhoma chuan, Mizorama Chakma chung­changah Mizo zawng zawngin hma an lakho theih nan Action Committee din ni a duh thu a sawi a, "Hnam issue a nih angin hnam angin hma i laho ang u," a ti.

Nimina ZNP pisaa inkhawmah thu sawiin Lalduhoma chuan, Chakma chungchangah hma lakho theih nan Action Committee din ila, tlawmngai pawl leh party tinte tel ila, Congress leh MNF-te pawh simin phûr takin lo tel ve se," a ti a; Chakma Autonomous District Council (CADC) pian chhuah dan chu mi thiamte'n ngun takin zir se, ṭhiah a nih theih nan kawng zawn ni se a duh thu a sawi.

Lalduhoma chuan, January, 1950 hnu lama Mizorama lut Chakmate chu electoral roll aṭanga paih Election Commission of India (ECI)-in a phal nia sawiin, "January 1950 hnu lama lo lutte chu hnawhchhuah vek ni rawh se," a ti a; kum 1950 hma lama awm tawhte erawh chu unau anga en law law leh thlamuang taka chenho tum mai tawh ṭha a tih thu sawiin, "Village register fel taka siam ni se, lo lut rute mana ûm chhuah nghal zel a nih theih nan record fel tak vawn ni se," a ti.

ZNP President chuan, Chawngte chu district headquarter-a siam a, Mizoram sorkar officer rualte'n a hmunah ṭhutchilh se ṭhaa a hriat thu sawiin, "Police battalion headquarters emaw, Home guard hmunpui emaw dah ila," a ti a; ràlkhat aṭanga enkawl ai chuan a fuh zawka a rin thu a sawi.

Ch. Chhunga chief minister a nih laiin Lamthaiah project siamin Mizo khua din a ni a, in 60 lai an tling hman tih sawiin Duhoma chuan, "Khatiang dungzui khan development project siamin Mizo khua va din thluah ila, mi an pèm duh nan facility leh incentive ṭul apiang pe ila; keimahni hian kan va chîmral zawk tur a ni. CEM pawh Mizo ngei a nih hun a la thleng mai ang," a ti.

Lalduhoma chuan, Chakmate chu an home land atan Pathianin Bangladesh a pe a, Bangladesh sorkarah MP leh minister-te pawh an nei reng nia sawiin, "An ramah hian zalen taka an awm kan duhsak a, a hranpain kan haw reng reng lo. Kan ṭhenawm ṭha tak ni se tih hi kan duh. Ṭhenawmte ram chhunga luh rûk leh chàm hlen erawh kan remti ngai dawn lo," a ti a; politician-te chu vote ît vanga Chakma thlavâng hauh tawh lo turin an ngen tih a sawi bawk.