Nuai 27.80 tihchingpen thubuaiah ACB-in mi 13 thubuai an siamsak

Anti Corruption Bureau (ACB) chuan tun hnai khan sorkar sum cheng nuai 27.80 tihchingpen chungchangah mi 13 thubuai an siamsak.

ACB-te hian an FIR dawn bawhzuiin, Hindi lama Mizoram hmasawnna tura sum ruahmanah a hman dan dik lo a awm leh awm loh an chhui a, cheng nuai 27.80 chu dik lo taka hman ni ngeiin an hmu chhuak a ni.

An thil hmuh chhuahte chu ACB hian sorkarah (Vigilance department) an thehlut tawh a, sorkar chuan criminal case-a kalpui zel turin thutlukna a siam.

Thubuai siamsakte hi a tam zawk chu Hindi kaihhnawiha hna thawkte an ni a, ACB report-a an hna­thawh tarlan lohte chu - C Lalfinga s/o C Ngurzama (L), Republic Veng; Reuben VL Hruaizela s/o Lalbiakthanga, Hmunṭha; Lalluahpuia Fanai s/o Lalrintluanga, Salem Veng leh AZ Chautha s/o AZ Raihini, Siaha te an ni.

Hindi kaihhnawiha thubuai siamsakte
Hming Nihna
Bishnu Joshi Durtlang Hindi School Principal
K Vanlalhlua Rastrabasha Vidyarthi Sangh President
A Chatlua Maraland Hindi School Principal
Ch Lalchhuanmawia Lawngtlai Chandmary Hindi School Principal
K Kungtea Old Saiha Hindi School Principal
Lalhmingthanga VLD Hindi School Principal
C Lalbuatsaiha Rashtrabhasha Vidyalaya Principal, Zemabawk
NG. Beingachi Tuipang Hindi School Principal
Jerry Zonunmawia Chhingchhip Hindi School Principal