Zirtirtu indaih lohna a nasa - Education Minister

School Education minister H Rohluna chuan Mizoramah zirtirtu indaih lohna a nasat thu a sawi a, "Sum indaih loh vangin duh angin kal hleih theih a ni lo," a ti.

Nimina Maubuang High School building sak thar a hawnnaah Edcucation Minister chuan, "Sikul hrang hrangah zirtirtu indaih lohna a nasa hle. Primary school-ah phei chuan zirtirtu pakhat chauh awmnate a awm. Zirtirtu post ruak hi primary school-ah 882, middle school-ah 460 leh high school-ah 267 kan nei a ni," a ti.

H Rohluna chuan, sum indaih lohna karah sorkarin zirna a ngaih pawimawh avangin zirtirtu lak belh a nih tur thu sawiin, "Tun aṭanga rei vak loah primary school-ah zirtirtu 100 leh middle school-ah zirtirtu 60 lak belh a ni dawn a, high school bikah methematics leh science teacher 111 lakna tur MPSC-in an buaipui mek," a ti a; zirtirtu lak belh ni mah se, indaih lohna a phuhru zo dawn lo tih a sawi.

Zirtirtu hna chu professional a nih avangin sokarin training a ngai pawimawh tih sawiin Minister chuan, "IASE leh Mizoram University-a B.Ed zirna bakah, Aizawl leh Lunglei DIET-ah B.Ed zirna hawn tum a ni a, kuminah class ṭan hman tum a ni," a ti.

H Rohluna chuan, nu leh pate'n an fate tana an pek theih ṭha ber chu zirna a nih thu sawiin, "Nu leh pate'n an fate lehkha ṭha taka an zirtir hian ro ṭha ber an pe a ni tih hi mithiamte ngaihdan a ni," a ti a; naupang hlawhtlinna turin nu leh pa leh zirtirtute an ṭan rual a pawimawh thu a sawi.

Maubuang High School building thar hi Oil India Ltd.-in cheng nuai 15 an pek hmanga sak a ni a, class room bakah headmaster room leh teacher common room-te a awm a ni.