Congress thlak nan MNF min duh ber - MNF Sr. Vice President

MNF senior vice president Tawnluia chuan, Congress sorkar chu mipuiin thlak ngei ngei an duh tawh niin a sawi a, "Mipuiin Congress sorkar thlak nan hian MNF hi min duh ber tih a chiang hle," a ti.

Nimina Khawzawl Vengthar YMA Hall-a MNF Tuichang North Block-in an party zawm thar lawmna inkhawm an buatsaih a hmanpuinaa Tawnluia chuan, "Mipuiin Congress sorkar thlak an duh chhan hi sawi mai sen pawh a ni lo. Corruption a nasa em em a, lal chhungkua uchuak takin an invulh a ni," a ti a; zu zawrh ringawt pawh tlak chhan a tling niin a sawi.

Tawnluia chuan, MNF chu hnam dangte chîmralna tur laka Mizo hnam din chhuahna atana din nia sawiin, "Martarte thisena bual a ni a, engti kawng pawhin he hnam tan hian nghet takin a ding tlat zel dawn. Hma kan sawn zel a, kum 2018 inthlanah hian Pathian leh mipui zarah kan sorkar ngeiin ka ring a ni," a ti.

MNF thuchhuah chuan, nimina Khawzawlah inkhawmah hian party hrang hrang aṭanga MNF zawm thar mi 411 an lawm lut niin a tarlang.