Joint NGO-in Chakma an pawm thei lo ; Mizoram police-te chêt dan uchuak an ti

NGO Coordination Committee (Joint NGO) chuan thuchhuah siamin, Mizoram quota-a MBBS leh BDS zir tur thlannaah Chakmate'n ram leilung fate chanvo ang chan an tum chu an remtih loh thu leh, MZP-in an dodalnaa Mizoram police-te chêt dan chu uchuak ah tih thu an tarlang.

Central YMA, MHIP, MUP, MZP leh MSU telna Joint NGO chu nimin khan Central YMA committee room-ah an ṭhukhawm a, Mizorama Chakma-te chungchang an ngaihtuah a, meeting-a an thurel angin thuchhuah an siam a ni.

Joint NGO chuan, Chakma-te chu ram leilung faah engtik lai mahin an pawm thei lo tih sawiin, "Ram leilung fate chanvo ang chang thei niin kan ngai lo. He thil chungchanga MZP hmalakna hi kan thlawp tlat a ni," an ti a; Mizoram quota-a MBBS leh BDS zir tur thlan chungchanga sorkar hmalakna chu en zui zel an rel thu an tarlang.

Mizoram quota-a MBBS leh BDS zir tur thlan dan vanga tun hnaia zirlaite dodalna chu hnam thil a ni tih sawiin Joint NGO chuan, "Mizo zirlaite chunga police-te chet dan kha uchuak kan ti a, thisen chhuak hiala zirlai naupangte kut thlak an ni hi pawi kan ti a, tun hnuah thleng tawh lo se," an ti.

July 20, 2017-a zirlaite leh police-te innawrnaa Aizawl Police Station Officer-in-Charge chu MZP hruaitu zahpah hauh loa ṭawngkhumah puhin NGO-te chuan, "NGO Coordination Committee chuan kan hrethiam thei lo," an ti a; Aizawl PS OC chu tun hnuah chuan fimkhur tawh turin an chah.

Joint NGO chuan, kum 2018 Assembly inthlan awm turah political party tinte chu candidate-ah Chakma an awm loh nan hma la turin an ngen a; hemi chungchangah leh Citizen Amendment Bill 2016 chungchangah political party tin hruaitute chu hun remchang hmasaah sawipui an rel a ni.

NGO Coordination Committee chuan, kum 2016-a Mizo Students Union leh sorkarin Persons with Disabilities Commissioner chungchanga inremna an neih hnuah, MSU hruaitu 12-te Court-a koh an ni leh si chu ṭha an tih loh thu an tarlang a, "An case hi titawp nghal turin sorkar kan phût tlat a ni," an ti.