Bekang umtute tan training buatsaih

Mizoram Food Pro­cessing Research & Trai­ning Centre (MFPRTC), RIPANS leh Health Services directo­rate-a Food & Drugs Admi­nistration chuan nimin Aizawl leh a chhehvel veng hrang hranga bekang uma eizawngte pualin MFPRTC, Selingah bekang um dan zirna an buatsaih a, ni li chhung a awh ang.

Training hawnna in­khawmah hian RIPANS-a Pharmacy department HoD Dr H Lalhlenmawia chuan, bekang eisual palh vanga buaina leh harsatna a awm ta zeuh zeuh tih sawiin, "Dam­dawi lam mithiamte leh mi chinchang hria leh ngaihtuah mite'n an vei a, bekang uma eizawngte mumal taka training buatsaih a ni thei ta hi a lawmawm hle," a ti.

Dr H Lalhlenmawia sawi danin, bekang umtute chu bekang um dan zirtir an ni dawn lo a, bekang umah micro-organism leh bacteria (hrik) hlauhawm a pian theih dan leh chumi laka inven theih dan turte zirtir an ni. Bekang sawngbawl dan chi nga hmangin bekang um a ni ang a, laboratory-ah endik a nih hnuah, a ṭha ber chu chin chhunzawm tum a ni.

Training-ah hian bekang um ṭhin mi 26 an tel a ni.