Chawchhûn pekna sikulah A thlawnin tui pek a ni dawn

Mizoram sorkar chuan sorkar enkawl primary school leh middle school, chawchhun (midday meal) pekna sikulte chu a thlawna tui connection pek a tum.

School Education mi­nister H Rohluna leh PHE minister Zodintluanga hoin nimin khan PHE Minister pisaah depart­ment pahnih hotute an ṭhukhawm a; sikul nau­pang chawchhun kal­puina sorkar P/S leh M/S-te tui mamawh leh tui bill chawi harsatna chungchang an sawiho.

Meeting chuan, chaw­chhun pekna sikula tui thianghlim pek chu uni­versal elementary edu­cation hlawhtlinna atan thil pawimawh tak a nih avangin, sorkar enkawl P/S leh M/S zinga PHE department tui connection neite chu kum hnih chhung thla tin tui litre 5,000 a thlawna pek turin an rel a; ruahmanna chu kum hnih hnuah ennawn leh turin thu an dah.

Meeting-a tarlan danin, naupang zawng zawngin elementary education an neih theih nana hmalakna zinga mi, chawchhun pek ṭhin chu zirlai leh nu leh pate'n an chhawr ṭangkai hle a; mahse, chawchhun atan sorkarin sum hman tur a bitukin chaw leh a hmeh tlem leina bak a daih lo.

Chaw chhum nan te, in tur atan leh thil dang dang atan tui thianghlim mamawhna sang a, mahse, a hranpaa sum pek a awm loh avangin Mizo­rama sikul hrang hrangah zirtirtute'n pawi­sa thawhkhawmin emaw, annual grant aṭang­in emaw tui bill an pe mai ṭhin a ni.