RNTCP-in home-a awmte an enfiah

Revised National TB Control Programme (RNTCP) chuan, sorkar laipui thu angin tunlai hian Mizorama home hrang hranga awmte zingah clinic an nei mek a, ngawr (TB) vei hmuh chhuah an nei nual.

RNTCP hian prog­ramme officer Dr Lily Chhakchhuak hoin tun kar July 24-25 khan Ṭawngṭai Bethel Camping Centre-ah TB clinic an buatsaih a; Thawhṭanni khan mipa ho tan buatsaihin, nimin khan hmeichhe ho tan an buatsaih. Mipa an en zat chu 756 a ni a, hmeichhia an en zat chu 127 a ni.

Aizawl district bikah chuan RNTCP hian home-a awmte enfiah hna hi July 18, 2017 khan an ṭan. July 18 leh 19-ah TNT-a awmte enfiahin, mi 839 en enfiah a, TB vei hmuhchhuah an nei.

July 20-ah Hermon Children's Home enfiahin, mi 68 an enfiah a; July 21-ah Aizawl District Jail-ah clinic an nei leh a, jail táng mi 25 an enfiah. July 21-ah vek hian Muanna In, Mualpuia awmte an enfiah bawk.

Home-a awmte TB an vei leh vei loh enfiah hna hi an chhunzawm zel dawn a; July 27-ah Rescue Home leh Gan Sabra, July 28-ah Damna In leh Remand Home-te an enfiah leh ang. Home enfiahtu RNTCP team-ah hian member 12 an awm a ni.

Dr Lily Chhakchhuak chuan, home hrang hranga awmte (inmate) TB an vei leh vei loh enfiah chu sorkar laipui thuchhuak anga kalpui a nih thu a sawi a; district dangah pawh kalpui mek a nih thu a sawi bawk.