Ultrasound neitute dan zawm tur sawiho

State Supervisory Board on Prenatal Conception and Prenatal Diagnostic Technology (PCPNDT) chu nimin khan Chief Minister's Office (CMO) conference hall-ah Health minister Lal Thanzara hoin an ṭhukhawm a; ultrasound neitute'n dan an zawm leh zawm loh an sawiho.

PCPNDT Rules 1996-in a sawi angin, ultrasound awmna sorkar leh private hospital, clinic leh centre reng rengin nu naupai an endikna report Form-F chu dan ang thlapin thuneitute hnenah an endik aṭanga chhiara thla thar ni nga ral hmain an thehlut ṭhin tur a ni.

Ultrasound centre-te chu thla thum dan zelah State Inspection and Monitoring Committee (SIMC)-te'n an tlawh ang a, sorkar laipuiin kaih­hruaina a siam Standard Operation Guidelines an zawm leh zawm loh uluk takin an endik ṭhin tur a ni.

Tun hnai khan SIMC-te'n Kolasib leh Serchhip district an tlawh a, thil fel lo hmuh tur a awm loh thu SIMC aiawh­ten meeting-ah hian an sawi.

Sorkar laipuiin PCPNDT Rules 1996 siam danglamin, dan thar Rule 19A a belh a; chu danin a sawi ang chuan, state sorkarin State Appellate Authority din turin hma a lak mek thu tarlan a ni. State Appellate Authority hi Health Secretary emaw, State Appropiate Authority tlukpui emaw, a ai sang zawkin emaw a kaihruai ang.

Mizoram chhungah ultrasound khawl awmna centre 48 a awm mek a; Aizawlah 27, Lungleiah paruk, Lawngtlaiah pali, Champhaiah pali, Siahaah pathum, Kolasibah pahnih leh Serchhip leh Mamitah pakhat ve ve a awm a ni.