MZP-in báng ngam turin Dr BD Chakma an phût

MZP hruaitute nimina an conference hall-a ṭhukhawm chuan, Chakma zirlai palite'n MBBS leh BDS conselling an tih theihna atana hma latua an puh minister of state Dr BD Chakma chu minister aṭanga báng turin an phût.

MZP chuan, "Tun ṭum thil thlengah hian Chakma zirlaite hi Chakma minister-in a lo mikhual bakah a buaipui a, Mizoram sorkarin motor pein a hruai thlap a ni. Minister Dr BD Chakma ṭhahnemngaihna vang-in Mizo zirlaite hma-chhawn turin police tam tham tak tirh an ni a, Chakma laka Mizo hnam him nana kalkhawm Mizo zirlaite'n Chakma minister vanga kut kan tuar hi ná kan ti hle. Dr BD Chakma hi minister a nihna aṭanga báng ngam turin kan phût a ni," an ti.

Mizoram political party hrang hrangte chu kum 2018 MLA inthlan awm turah hian candidate-ah Chakma dah lo tur leh, Mizote chauh candidate turin an ngen a ni.

MZP meeting chuan, Mizoram quota-a MBBS leh BDS zir tur thlan chungchangah hnam tana theihtawp chhuahtu zirlaite chungah lawm-thu an sawi a, "Ram leh hnam tan Mizo mipui kan ṭanrualzia a lo lang hi a lawmawm hle. MZP leh sorkar inremna ang-in, Mizo zirlai bikte tan counselling hi a rang thei ang bera neih ṭhat leh a nih theih nan thuneitute'n hma la thuai se ṭha kan ti," an ti.