Mi dang mawhpuhah Transport Minister puh

MNF ṭhalaite chuan Transport minister John Rotluangliana chu a mualphona hliahkhuh nana mi dang mawh-puhah an puh.

MNYF chuan, July 14, 2017-ah Mamita maxicab pakhat chu motor hnungah ‘Mamit kawng chhe lutuk hi ka chau’ tih tàr a nih vang-in man a ni tih sawiin, "Hemi ní hian Transport Director chuan thupek chhuah nghalin, Mizoram Motor Vehicle Rules, 1995, Rule 150(1) bawhchhiate chungah action la turin a ti a. Public service vehicle, a bikin maxicab eng emaw zat man a ni. Hei hi MNF ṭhalai chuan dan lekkawhnaa Congress sorkar hlawhchhamzia tilangtuah kan ngai," an ti.

Public service vehicle-te chu an service dawnah sorkar aṭangin an service thei ngei a ni tih phalna (fitness) an paltlang hmasak a ngai tih sawiin MNYF chuan, "Maxicab-te hi service thei ngei tura phalna nei vek tawh an nih avang-in, Congress sorkar hi anmahni leh anmahni an intimualpho mai mai a ni," an ti a; maxicab dan bawhchhia nia sawi ṭhenkhat chu an dan bawhchhiat inangah pawh a ṭhen Rs. 100 chawitir an nih laiin, a ṭhen chu Rs. 500 chawitir an nih thu an sawi.

MNF ṭhalai chuan, July 14, 2017-a Transport Director-in order a chhuah-ah, enforcement staff leh inspecting authority (MVI)-te inthlahdah vang a nih thu a tarlang tih sawiin, "Thawktute leh dan lek kawhtute’n theihtawpa hna an thawh laia Transport Minister-in a mualphona hliah khuh nana an lama ball a beng per mai leh, maxicab neitute’n an tuar hi mak kan ti. Transport minister John Rotluangliana hian a hna a tlin hlawl loah kan ngai a, minister aṭanga bâng ngam turin thu kan ràwn a ni," an ti.