Aizawla lirthei tlân dan tidanglam

Traffic SP chuan thuchhuah siamin, Aizawl khawpui chhung, Bawngkawn kawngpui dunga lirthei chêt vel dan a fel zawk nan leh mipui vantlang him zawk nan lirthei lian, MMV/HMV-te Aizawl khawpui chhung lut loa Bawngkawn kaltlanga Zemabawk leh Sairang lama kal turte tlan dan tur ruahmanna thar a siam.

Ruahmanna thar siam hi thla khat chhung enchhin phawt a ni ang a, August 1, 2017-ah hman ṭan a ni ang. Lirthei tlan dan tur ruahman anga tlan chhin a nih chhungin ruahmanna siam a ṭhat tâwk lohna emaw, a ṭhat zawk dan tur rawtna neite chu ziakin Traffic SP pisaah rawtna thlen tura ngen an ni.

1. Bawngkawn leh Zemabawk inkar No Entry hun chhung chu hetiang hian tihdang-lam a ni.
a) No Entry hun zing dar 7 aṭanga zan dar 8 inkar ni ṭhin chu zing dar 8 aṭanga zan dar 7 a ni tawh ang.
b) Entry hun chhung zan dar 7 aṭanga zing dar 8 inkarah lirthei liante Bawngkawn leh Zemabawk inkarah an tlan kawp thei ang.
c) Sairang panna kawngpui aṭanga Ṭhuampui lama tlân tlang duhte chu zing dar 8 aṭanga zan dar 1 inkar chhung an tlan phalsak a ni.
d) Ṭhuampui aṭanga Sairang road lam tlan tlang duhte chu chawhnu dar 1:30 aṭanga zan dar 7 inkar chhung an tlan phalsak a ni.
2. Ch Saprawnga Truck Terminal leh Bawngkawn inkarah MMV leh HMV-te an stand-a ding tih loh chu kawngpui sira din/park phal a ni lo.