Kawnpui - Hortoki inkar kawngah Ni khata lirthei tlân phal zat siam

Kawnpui leh Hortoki inkar kawng siam hna chak zawka thawh a nih theih nan August 1-15, 2017 chhungin he kawngpuiah hian ni khatah lirthei lian chi pali aia tam kal phal a ni dawn lo. Hemi hun chhung hian Coastal Construction-in kawng siam hna an thawk ang.

Kawnpui SDO (C) Marilyn Rual-zakhumthangi hoin tun hnai khan a pisaah North East Frontier Railways hnuaia hna thawktu company hotu te, kawng hmangtute leh Kawnpui khuaa V/C leh Hortoki V/C te, tlawmngai pawl hruaitute an ṭhu-khawm a; rel kawng siamna atana bungraw phur motor lian-in Kawnpui leh Hortoki inkar kawng an rah chhiat nasat avanga mipuiin harsatna an tawh mekte sawiho a ni.

Kawnpui SDO(C) chuan, rél kawng siam hna thawktute chu hmanraw inchhêk khâwl chawlhsan rih turin a hriattir a, lei a hnip tawh avangin chhiatna nasa zawk a thlen loh nan August 1-15, 2017 chhung chu he kawngah hian ni khatah motor lian bungraw phur pali aia tam lo kal turin a hriattir a ni. Hemi chhung vek hian NF Railways-in kawng siam tura a tih Coastal Construction chu kawng siam hna chak taka kalpui tura tih a ni bawk.

Kawnpui leh Hortoki inkar kawng hi a chhe nasa hle a, khualzin phurtu maxicab-te an tlân ngam tawh lo a; Kawnpui aṭanga eirawngbawlna gas leh ration buhfai phur ṭhinte pawh an kal duh tawh lo a ni.