Hmarchhakah hnam angin tluk loh Enah min en vek - CM Zoramthanga

MZP Gen. Hqrs chuan nimin khan Vanapa Hall-ah 'Thu leh hla kûtpui' ni hnihna an hmang a; khuallian chief minister Zoramthanga chuan, India hmarchhakah Mizote chu hnam angin tluk loh enah an en vek niin a sawi.

CM Zoramthanga chuan, Mizote chu vantlang nun danah India hmarchhak bialah an chungnun thu sawiin, "Hmar­chhaka hnam hrang hrangte hian hnam ang chuan tluk loh enah min en vek tawh. Sakhuana lamah pawh kan bek thlêk lam an thlir ṭhup. Bible Society lamah pawh mi dang zawng zawng thawh belh khawm aia tam deuh thaw kan thawh ṭhin a ni," a ti.

Zo hnahthlakte chu thu leh hlain a hûi khawm tih sawiin Zoramthanga chuan, "Mi hruai khawmtu ber chu Duhlian ṭawng, Lusei ṭawng, Mizo ṭawng tia rawn chhuak hi a ni. Political, economic, thu leh hla, culture leh sakhuanaa min hruai khâwm turin Pathianin min siamsak a ni," a ti a; Mizo ṭawng tih chu tun hmain awm ngai lo mah se, eng tin tin emaw a indin chhoh thu a sawi.

Chief Minister chuan, tun hmaa zirlai pawl an hriat dan chu zirlaite hmakhua ngaihtuahtu bakah, thu leh hla lam a nih thu sawiin, "Hetianga MZP-in hun an buatsaih hi a lawmawm. Book of The Year dawng tawhte chawimawi an nite hi a lawmawm tak zet a ni," a ti a; thu leh hla lama theihtawp chhuah zel turin MZP-te a fuih.

Thu leh hla kûtpui hi chawhma lamah minister of state Robert Romawia Royte-in a hmanpui a; thu leh hla chu ram venhimna hmanrua a nih mai bakah, ram zau tak awp theihna a nih thu a sawi.

Robert Romawia chuan, lehkhabu chhiar uar thar a ngaih thu sawiin, hnam puitlinna kawng a nih avangin uar sauh sauh turin ṭhalaite a chah a, "Lehkha chhiar leh lehkhabu thar hriat hi a changkang a ni tih ṭhalaite'n i hre thar ang u. Ziak ngeia dah lehkhabu hi a rintlak a, hriatna lâkna atana hmanraw pawimawh ber a ni," a ti.

MZP president Lalnunmawia Pautu pawhin thu sawiin, Mizo ṭhalaite'n Korean an buaipui luih luih laiin Aizawl tih lam thiam mang lote an awm tawh niin a sawi a, "Kan ram, kan hnam, kan culture leh kan ṭawng vawnghim turin theihtawp i chhuah ang u," a ti.

Thu leh hla kûtpuiah hian chawhmaah Mizo Academy of Letter-in Book of The Year atana a thlan tawh zawng zawng ziaktute hnenah chawimawina hlan a ni a; chawhnuah B Vanlalzari, C Lalnunchanga, Prof. RL Than­mawia leh B Lalthangliana te kawmna hun hman a ni.