Mizoram-Assam ramri chungchangah Ramri hrûla DC pahnihte an inbia

Mizoram leh Assam ramri chungchangah nimin khan ramri hnaiha district commissioner (DC)-te 225 CRPF camp, Vairengteah an inbia. Inbiaknaah hian Mamit district-a kuhva rah chíng­tute harsatna tawh chung­chang sawi lan tel a ni.

Inbiaknaah hian Mizoram aṭangin Kolasib DC John LT Sanga, Mamit DC Lalnunhlua, Kolasib SP Vanlalfaka Ralte, Mamit SP Vineet Kumar, Kolasib DFO Margareth Lalramchhani leh official dangte an tel a; Assam aṭangin Cachar, Hailakandi, Karimganj DC, SP leh DFO-te bakah, sorkar official dangte an tel.

Inkawmnaa thu sawitu Kolasib DC John LT Sanga chuan, state pahnih in­kara ramri buaina chin­fel a nih theih nan leh boruak muanawm a awm theih nan state pahnihte minister level-a an inbiakaah DC-te chu thla hnih chhungin vawi khat tal inbe ṭhin tura tih a nih thu a sawi a, "He ṭhutkhawmna kal­tlang hian mahni district-a harsatna awmte sawiho­na hun ṭha a awm bakah, thawhhona ṭha tak hnuai­ah harsatnate chinfel theih a nih ka beisei," a ti.

Inbiak zawha thuthar thehdarhtute zawhna chhangin Kolasib DC chuan, ramria harsatna awmte chinfel tumnaah inbiaknain awmzia a neih an beisei tlat tih a sawi a, "Hmaichhan ngeia inhmuh a, inhmelhriat hian inmamawh hun atan thil tih a awlsam phah ṭhin," a ti. Sorkar level-a inbiakna a awm leh hnu Oct. 2022 velah inbe leh tura ruahmanna an siam chhin thu a sawi bawk.

INBIAKNAA SAWIHO TLANGPUI
1) Ramri hnaiha chengte'n an huan, lo leh ramte ṭha taka an enkawl chhunzawm theih dan tur.
2) State pahnih inrìna báwr vela ramngaw awmte humhalhnaa thawhho dan tur.
3) Ramri kâna dan kalha ramsa tawlhrûk awm ṭhin ven dan tur.
4) Ramria police duty-na hmun thawm ṭhat hna hrang hrang kalpui leh duty-na hmun kaltlanga hmalakna awm lo tura ruahmanna siam.
5) Thinghlun khaw bula Tlawngte luia lei dawh hna leh Zophai, Bairabia lei dawh hna chhunzawm dan tur. Hetah hian harsatna awm lian zualte chu chinfel a nih theih nan hotu lian zawkte hnena thlen an rél a ni.
6) Mamit district-a kuhva chíngtute'n an kuhva rah hralhna turah Assam state chhunga harsatna an tawh ṭhin chungchang. Mizorama kuhva tharte harsatna awm loa hralh theih nana hmalak dan tur sawiho a ni.