May 4-17 chhunga Mizorama Inkhârkhip dan tur puanzar a ni

Chief minister Zoramthanga hoa Cabinet meeting chuan, in­khârkhip kalpui chhunga mipui himna tura Health Minister-in 'Ordinance for Containment and Prevention of COVID-19' a chhawp chu an sawiho a, an pawm. Ordinance hnuaiah hian mipui himna tura khapna thupek bawhchhetute hrem theih dante sawifiah a ni.

Cabinet meeting chuan, sorkar laipuiin state páwna tangkhangte anmahni state-a hruai haw nan Indian Railways phalna a pek angin, Mizoram mi leh sa, state danga tangkhangte pawh Mizorama an haw theih dan tur ngaihtuah an remti. 

Manipur leh hmarchhak state dang aṭanga tangkhang hawte'n sorkar aṭanga a hrana puihna phût miah loa an lo haw hlawm chu fakawm an tih thu an sawi.

Council of Ministers meeting-ah hian deputy chief minister Tawnluia leh minister dangte an tel kim a ni.

Inkhàrkhip thawh thumna kalpui chhunga kaihhruaina SDMA Chairman-in Inrinnia a tihchhuaha a lan danin, Mizoram chhunga mihring phur lirthei (commercial passenger vehicle)-te an tlân thei tawh dawn a; khawpui chhungah bus, taxi leh auto-rickshaw-te an tlân phal a ni tawh ang.

Commercial vehicle-te chu registration number kawpkim leh kawpkim loin an intlân chhâwk dawn a; odd number (kawpkim lo)-te Thawhṭanni, Nilaini leh Zirtawpniah an tlân ang a, even number (kawpkim)-te Thawhlehni, Ningani leh Inrinniah an tlan ang. Pathianniah tlan phal a ni lo.

Motor phurh theih zat (seating capacity) chanve (50%) aia tam chuan phal a ni lo a, two wheeler taxi-te erawh tlân phal a ni lo.

Inkharkhip thawh thumnaah hian zirna-in leh sakhaw biakna hmunte khar chhunzawm zel tur a ni a; sorkar office-ah Group A&B-te an kal ziah ṭhin dawn a, Group C & D staff ṭhenkhat an inkai chhawk ṭhin ang.

Mipui punkhawm phal a la nih loh rualin, inneih inkhawm leh mitthi vuite chu mi 20 aia tam pung khawm loin kalpui theih a ni.

Sorkar lam leh local task force-te remruatpuinain dawr hawn phal a ni a, mahse, ni khatah dawr zawng zawng hawn phal a ni lo a, dawr indawtte chu ni inchhâwka hawn tur niin, tlai dar 5-ah khar vek tawh tur a ni.

International border leh inter-state border khâr chhunzawm zel tur a ni a, bungrua erawh phurh luh phal a ni.

I.    Ramri (international & inter-state):

1.    International leh inter-state border khâr mekte khâr chhunzawm tur.

2.    Ni tin mamawh leh phalna nei bungraw dang phur lirtheite tan Bairabi, Vairengte leh Kanhmun kaltlang kawngpuite hawn a ni ang a, mipui zin veivahna lirthei chu Home department phalna neite tan chauh tlân phal a ni.

4.    Ramri leh ramri dep khuaahte khauh taka duty chhunzawm zel tur a ni.

II.    Screening leh quarantine:

1.    Mizorama lut reng reng chu entry point-a screening centre-ah uluk taka enfiah zel tur.

2.    Driver leh handyman te, Mizoram páwn aṭanga bungraw laa zinte chu sorkar quarantine facility-ah an khawsa ang. Bungraw lak hna an thawh chhung chu mi dang nen intlawhpawh loin quarantine facility aṭangin an thawk ang a, load an lâk hnuhnun ber aṭanga ni 14 hnuah an inah haw phalsak a ni ang. Quarantine-a an awm chhungin an chhungte leh mi dang tlawhpawh phalsak a ni lo.

3.    State páwn lam lirthei driver leh handyman, bungrua rawn thiar lut ṭhinte chu khaw dáiah anmahniin eirawng an in bàwl ang a, khaw chhungah mi dang nen inchiahpiah loin an bungrua an unload zawh veleh an lêt leh nghal ang. Bungrua unload chhungin mi dangte aṭanga ft. 6 tala hláah an awm tur a ni.

4.    All Mizoram Petroleum Dealers Association leh Mizoram Tanker Drivers Association hnuaia tanker driver leh handyman, Mizoram páwn 

aṭanga oil phur luttute chu an oil phurh an unload hnuah Vairengtea an awmna tur ruahmanah an khawsa ang a, chuta ang chuan an chhungte nena intlawhpawh loin load an la ṭhin ang.

5.    A chunga tarlan driver leh handyman-te hian kawng laka harsatna an tawh thulhah State Control Room (toll free 1070, landline 0389-2335842/2335837 leh mobile 9366331931)-ah harsatnate an thlen thei ang.

6.    Phalna bik neia Mizorama rawn hawte chu an hriselna endik a nih hnuah châwl khawmuang loin an kalna tur district-ah an tlang ang. An district-a quarantine facility remchang berah ni 14 chhung dah an ni ang a, medical board-in a recommend chuan home quarantine phal a ni. (Home quarantine phalna hi District Medical Board chauhin an pe thei).

7.    Quarantine tura tih reng rengte chu 'mCOVID-19' hmangin an inziak lut vek tur a ni.

III.    Bungraw lak luh leh thiar:

1.    State páwn aṭangin essential commodity-te chu phalna lak ngai loin lak luh theih a ni a, 'mCOVID-19' chhunga mPass hmangin declaration an thehlut tur a ni thung.

2.    Ni tin mamawh ni lo, bungraw dang la lut turte chuan mCOVID-19 chhunga mPass hmangin Home department phalna an la hmasa tur a ni.

3.    Mizoram chhung bika bungraw phur leh thiarte tan phalna lâk a ngai lo.

IV.    Dawr leh sumdawnna hmun:

1.    Dawr, sumdawnna hmun leh eizawnna kawnga hmalaknate chu annexe-a Standard Operating Procedure (SOP) for Social Distancing zâwm chungin kalpui tur.

2.    Khawpui chhunga hmun lûn lai/dawrkàwna dawr inṭhenawmte chu ni khat kar danah an inhawn chhawk tur a ni. DC-te'n ruahmanna an siam ang a, ni záwna inhawn leh dawr inṭhenawmte ni khatah a ruala hawn phal a ni lo. Hei hian mihring leh ran damdawi dawr leh clinic a huam lo.

3.    Thlai leh chawhmehah task force-te'n chawhmeh zawrhna tur an ruahman ang.

4.    Chawhmeh, thlai leh theite in lama pek (home delivery) phal a ni.

5.    Public park, picnic spot, movie theatre, gym, spa, beauty parlour, community hall, bazarpui, shopping complex, mall leh intàwllènna hmun zawng zawng khâr zel tur a ni.

6.    Tuallai leh kawtthlera thil zawrh (street vending) khap a ni.

7.    Dawr zawng zawng (damdawi dawr tiam loin) tlai dar 5-ah khâr vek tur.

8.    Hotel-ah Mizorama khualzin chám mekte thlen phal a ni a; páwn lam mi (hotel-a thleng mikhual ni lo) an dawngsawng tur a ni lo.

9.    Restaurant hawn phal a ni lo a, home delivery erawh phal a ni.

V.    Zirna-in, biak-in leh punkhawmna:

1.    Administrative office hna pangngai kalpui mek tih loh zirna-in leh sakhaw biakna hmunte khâr zel tur.

2.    Inneih lawmna (reception), lungphun, anniversary leh birthday lawmna, games & sports, book release, politics leh pawl thila kalkhawmna leh intihhlimnate huaihawt phal a ni lo.

3.    Inneih inkhawm leh mitthi vuinaah mi 20 aia tam punkhawm phal a ni lo.

VI.    Zin veivah leh mipui chetvelna:

1.    Ṭul bik thila phalna pekte tan lo chuan state páwna zin khap a ni.

2.    Chhiat tawh, damloh leh eizawnna thil pawimawh bik a nih loh chuan zin veivah loh tur.

3.    Mizorama zin veivâk zingah Covid-19 symptom nei emaw, Covid-19 vei nena contact history nei emaw an nih loh chuan quarantine an ngai lo.

4.    Ram chhungah bungraw phur motor tlan phal a ni.

5.    Kár kawnga passenger phur lirtheite tlan phal a ni a, registration number odd-even angin an intlân chhâwk ang. Odd number-te Thawhṭanni, Nilaini leh Zirtawpniah an tlan ang a, even number-te chu Thawhlehni, Ningani leh Inrinniah an tlan ang. Pathianniah tlân phal a ni lo. Passenger ṭhut theih zat (seating capacity) aṭanga 50% chauh phurh phal a ni.

6.    Bus, taxi leh auto rickshaw-te pawh odd-even angin ni tin an intlân chhâwk ang. Passenger ṭhu thei zat aṭanga 50% chauh an phur thei. Two-wheeler taxi tlan phal a ni lo.

7.    Ṭul bik thila private motor tlante pawh odd-even angin an tlân ang.

8.    Intlân chhawk hian sorkar hnathawkte motor, duty nana hmante a huam lo.

VII.    Mipui vantlang tana inkhuahkhirhna:

1.    Mi panga aia tam pun khawm phal a ni lo.

2.    Ṭul bik thilah lo chuan mahni in leh compound chhuahsan loh tur.

3.    Tlai dar 7 leh zing dar 4  inkarah páwna chhuah khap a ni a, DC-te'n Cr.PC Section 144 tlawhchhanin inkhuahkhirhna thupek an chhuah ang. Hei hian Covid-19 chungchanga duty-te leh DC-in phalna a pekte a huam lo.

4.    Loh theih loh thil a nih loh chuan kum 65 chin chung lam te, taksa hriselna lama harsatna nei sa te, nau paite leh naupang kum 10 hnuai lamte chu mahni in chhungah inkharkhip tur a ni.

5.    Páwn chhuak tur leh damdawi-in a kal tur reng rengin hmai an tuam tur a ni.

6.    Vantlang hmun leh dawra kalte chu ft. 6 tala inhlata awm tur.

7.    Ramri dep khuaa chengte'n ram páwn lam mi mikhual an nei tur a ni lo.

VIII.    Sorkar pisa kai leh dawr:

1.    Health services, police, home guards, civil defence, fire & emergency services, disaster management, civil aviation, prisons, excise & narco­tics, municipal services, forest field works, PHE leh P&E department-a technical staff-te chu a pangngaiin an kal ang.

2.    Sorkar pisa dang zawng hawn a ni ang a, group A leh B officer-te kal vek tur a ni. Group C leh D-te erawh chu hmun thuma ṭhena hmun khat zelin an inkal chhâwk ang.

3.    Head of office-te'n khauh takin SOP on Social Distancing an kalpui tur a ni.

4.    Office chhungah phalna la hmasa loin páwn lam mi kal phal a ni lo, phone-in emaw an hmuh duhte phalna an la phawt tur a ni.

5.    Ṭul bikah lo chuan meeting neih loh tur, video conferencing leh online mode hman ṭangkai tur.

6     Department/office dangte nena indawr ṭulna thilah email/electronic media dang emaw hman tum tur a ni.

7.    Mipuiin sorkar department-te ralkhat aṭanga an dawr theih nan department tinin IT an hmang ṭangkai tur a ni.

IX.    Hmalakna dang:

1.    Social distancing hmangin hmasawn nana hmalakna leh mimal eizawnna chu phalna hranpa lak ngai loin ram chhunga awm sa labour-te chauh ruaiin kalpui theih a ni.

X.    Hremna dan:

1.    Thupek zâwm lo chu Disaster Management Act, 2005, Section 51-60, The Mizoram (Containment & Prevention of COVID-19) Ordinance, 2020 leh IPC Section 188 hmangin hrem theih a ni.

Social distancing (physical) kalpui dan tur

1.    Sorkar, pawl leh mimal pisa:

a)    Head of department/office-te'n khauh takin pisa chhungah social distancing an kalpui tur a ni.

b)    Head of department/office-te chu office vawn fai leh tihthianghlim kawngah mawhphurtu an ni a, office chhungah kut silna hmanrua (tui, sahbawn / handwash) an chhawp ngei tur a ni. Office dawr turte tan gate/kawtkaiah kut silna tur emaw hand sanitiser emaw an dah tur a ni.

c)    Office chhungah phalna la hmasa loin páwn lam mi luhtir loh tur.

d)    Head of department/office-te'n an office-a lirthei leh bungrua, páwn lam aṭanga lutte tihthianghlim dan tur an ruahman ang.

e)    Office chhung leh pâwna thil/bungruate tihthianghlim (disinfect) ṭhin tur a ni.

f)    Office bus leh sorkar lirthei, staff-te office kalna atana ruahmanah seat awm zat aṭanga 50% chauh phurh tur.

g)    Office hnathawk, dam lohna nei sa emaw hrisel lohna bik nei leh nau pai, office kal thei lote chu chawlh (commuted leave) pek an ni ang.

h)    Electric, tui leh phone bill, etc. pekna hmunah mi an pun khawm tam loh nan ruahmanna siam tur, online-a bill pek uar ni se.

2.    Bazar, dawr leh sumdawnna:

a)    Mi pathum aia tamin dawr pakhat an nghak tur a ni lo.

b)    Dawr nghaktute'n face mask hman leh kut silfai reng tur.

c)    Dawr neitute'n dawr chhung leh páwnah social distancing ft. 6 kar danah an rìn tur a ni.

d)    Thlai leh chawhmeh dang zuartute'n hmai an tuam tur a ni.

3.    Hnathawhna hmun dang:

a)    Hna thawhna hmunhma fai takin vawn tur a ni a, a neitu/chhawrtu 

ṭheuhin mawhphurhna an la ang.

b)    Kum upa, dam lohna nei sa emaw hrisel lohna bik neite leh nau paite chhawr loh tur a ni.

c)    Ṭum khatah mi panga aia tam thawh loh ni se, ṭul bik thilah chuan mi panga aia tam inhlat taka awmin hna thawh tur.

d)    Lo/huan neitu te, ran/sangha dil neitute leh thawktute an hna thawhna hmunah ṭheuh mi dang nena inhlatin hna thawh tur.

e)    Puan ṭhuina, lu mehna, pheikhawk chhe siamna, etc.-ah mi panga aia tam awm phal a ni lo.

f)    Bungraw load leh unload-ah bungraw phurtu driver leh handyman-te'n hna thawktute an tawk tur a ni lo.