Mizoramah jail a tâwt, biak-in a tháwl

Mizoramah jail-te tunlai hian a tâwt a, belh khawmin jail hrang hranga táng awm thei zat aia 437-a tam táng an awm mek. Hetih lai hian, biak-in hrang hrangte erawh chu tunlai hian a tháwl deuh vek a, tualchhung kohhran hrang hrangin Covid-19 lèn hmaa inkhawm zat an pha lo tlangpui.

Mizorama jail dinhmun
Home department hnuaia Prison Directorate chhinchhiah danin, August 22, 2022 khan Mizoram pumah jail-a táng mek mi 1,579 an awm a, chutih laiin, jail hrang hranga awm thei tur zat belh khawm chu 1,386 a ni a; awm thei zat aia 437-a tam táng mek an awm tihna a ni.

Mizorama jail lian ber, Central Jail-ah chuan tang awm thei zat 438 a nih laiin, tang mek mi 717 an awm a, awm thei zat aia 279-a tam an táng mek tihna a ni. Aizawla CWJ leh District Jail te, Lunglei leh Champhai district jail-ahte táng awm thei zat aia tam táng an awm mek bawk.

Siaha, Kolasib, Serchhip, Lawngtlai leh Mamit district jail-ahte táng awm thei zat an awm tling lo thung a; jail khah lohna district jail pangaa hmun ruak awm zat chu 244 a ni.

District jail ṭhenkhat khat lo mah se, jail ṭhenkhatah táng awm thei zat aia tam daih táng mek an awm avangin, Mizoram pum ang chuan jail hrang hranga táng awm thei zat aia 437-a tam tang mek an awm a ni.

Biak-ina inkhawm dinhmun
Mizorama jail hrang hrangte a tâwt viau laiin, biak-inte erawh a thawl tlangpui a, a bikin khawpuiah inkhawm zatin Covid-19 lèn hma a phâk loh hlawm laiin, thingtlang lamah erawh chuan ngai an awh chho ṭan mek hlawm.

Vanglaini palaiin tualchhung kohhran mite a biak kualna aṭangin, Nilaini zan leh Inrinni zana inkhawmah biak-inte a tháwl lehzual tih a lang. Tualchhung kohhran lian zual deuhah chuan kohhran member zat aṭanga inkhawm zat 10% a tling lo tlangpui a; Pathianni chawhma leh zanah inkhawm an tam hret a, Covid-19 lên hma anga biak-in khat ṭhap erawh an awm lo tlangpui.

Aizawla inkhawm dinhmun
Mizorama tualchhung kohhran lian ber, Mission Veng Kohhranah member 4,075 (2021 inchhiarna) an awm laiin, Nilaini zan leh Inrinni zanah chuan mi 200-300 vel an inkhawm tlangpui a, chu chu member zat aṭangin 4.91% - 7.36% a ni. Pathianni zanah erawh an ṭha hret a, mi 600-900 vel (14.72% - 19.63%) an inkhawm ṭhin. An biak-in ṭhutnaa ṭhu leng zat chu 1,200 a ni.

Kohhran member 4,000 vel awmna Durtlang Presbyterian Kohhranah Nilaini zan leh Inrinni zanah mi 150-200 (3.75 - 5.00%) vel leh Pathianni zanah mi 500 (12.50%) vel an inkhawm ṭhin a; member 3,500 vel awmna Chanmari Kohhranah Nilaini leh Inrinni zanah mi 200 (5.71%) vel leh Pathianni zanah mi 700 (20%) vel an inkhawm tlangpui.

Baptist Church of Mizoram (BCM), Aizawl City Church-ah member 820 vel awmin, Nilaini zan leh Inrinni zanah mi 50-60 (6.10 - 7.32%) vel leh Pathianni zanah mi 100 (12.19%) vel an inkhawm ṭhin a; Covid-19 lèn hma an la pha lo.

Salvation Army, Ebenezer Corps, Venghnuaiah member 600 vel awmin, Nilaini zan leh Inrinni zanah mi 70-100 (11.67 - 16.67%) inkar an inkhawm ṭhin a; Pathianni zanah mi 200-250 (33.33 - 41.67%) vel an inkhawm ṭhin.

UPC (Mizoram), Durtlang Mel-5 Kohhranah chuan member 300 vel awmin, Inrinni zanah mi 50 (16.66%) tling lo an inkhawm ṭhin a, Pathianni zanah mi 70-100 (23.33 - 33.33%) vel an inkhawm ṭhin thung.

Aizawl páwn lam
Khawpui lamah biak-in a thàwl viau laiin, thingtlang lamah erawh chuan biak-in thàwl dan a ziaawm deuh. Phulpui Field Veng Presbyterian Kohhranah chuan member 300 chuang hret an awm a, Nilaini zan leh Inrinni zanah mi 60 (20%) vel leh Pathianni zanah mi 140 (46.67%) vel an inkhawm ṭhin.

Member 520 vel awmna Sialsuk Hmunchung Presbyterian Kohhranah chuan Nilaini zan leh Inrinni zanah mi 30-50 (9.61%) vel leh Pathianni zanah mi 80-120 (15.38 - 23.08%) vel an inkhawm ṭhin. Darlawn Venghlun Presbyterian Kohhranah member 868 awmin, Nilaini zan leh Inrinni zanah mi 60-70 (6.91 - 8.06%) leh Pathianni zanah mi 200-250 (23.04 - 28.80%) vel an inkhawm ṭhin a; hripui len hma nen an dinhmun a inang deuh reng tawh a ni.

Lawngtlaia BCM Nazareth Kohhranah member 645 awmin, Nilaini zan leh Inrinni zanah mi 50 (7.75%) vel leh Pathianni zanah mi 80 (12.40%) vel an inkhawm ṭhin a; Covid-19 lèn hmaa an dinhmun an la pha lo hle tih an sawi.

Kolasib Vengthar South Presbyterian Kohhranah member 650 vel awmin, Nilai zan leh Inrinni zanah mi 60 (9.23%) vel leh Pathianni zanah mi 90 (13.85%) vel an inkhawm ṭhin a; member 3,077 awmna Champhai Vengthlang Presbyterian Kohhranah chuan Nilaini leh Inrinni zanah mi 150-200 (4.87 - 6.50%) leh Pathianni zanah mi 400-500 (12.00 - 16.25%) vel an inkhawm ṭhin bawk.