Aizawlah Tea Symposium buatsaih

India Formasa, Angel Business Promoters leh Tharthilthlentu (TiLi)-te chuan nimin khan Aijal Club-ah Tea Symposium an buatsaih a, deputy chief minister Tawnluia'n a hmanpui.

Sawihonaah hian National Chung Hsing University, Taiwan aṭanga mithiam telte nen thingpui sâwngbàwl dan zirho a ni a; MLA pahnih - Dr F Lalnunmawia leh Zothantluanga te, Horticulture department hotu te, Central YMA leh All Mizoram Farmers Union hruaitu te, Sialhawka lakhuihthei chíngtute leh Mizoram hmun danga kuty hnathawktute an tel a ni.

Kum 2019 khan Taiwan mithiamte'n Mizorama thar thingpuifete zir chian turin an ramah an hàwn a, an sâwngbàwl dan anga sâwngbawlin, man to zawka hralh theih turin an siam chhin a ni. Tun ṭumah hian an hmalak tawhnate bawhzui tura lo kal an ni a; thingpui thar tamna khua - Biate, Dárzo leh Reiek khuate fanpui an ni.

Deputy Chief Minister chuan, Mizorama thingpui chíngtute leh agriculture-a innghat loneitute hmasawnna ngaihtuah tura Taiwan aṭanga lo zin National Chung Hsing University professor-te leh zirlaite chungah lawmthu a sawi a, "Thingpui chíngtute tan an thar chhuahte Taiwan thingpui ṭha mi - premium brand ang tluka sâwngbàwl dan tur ngaihtuahpuia thawhhona ṭha tak kan nei thei tur hi a lawmawm tak zet," a ti.

Tuichang bial chhung khaw ṭhenkhata lakhuihtheite ram páwna thawn a nih dan sawiin Tawnluia chuan, "Taiwan pineapple cake, khawvel hmun hrang hranga an làrpui khawpa tui siamna atan pawh ṭangkai thei tur a ni a, ngaihtuahna sên a ṭul," a ti a; symposium chuan Mizorama agriculture-a innghat industry-te ṭhan len zelnaah kawngro a sut ngei a beisei thu a sawi.