Lungsen H/S-ah zirtirtu dah belh thei rih lo

Lungsen High School-a zirtirtu dah phûta sikul kái tur dan a nih chungchangah School Education Directorate chuan nimin khan thuchhuah siam in, Lungsen H/S-ah zirtirtu dah belh a harsat rih thu a tarlang.

School Education department chuan, Lungsena sikul khàr a ni chu pawi an tih thu a tarlang a, "Hmun hrang hranga zirtirtu indaih lohna nasa tak karah Lungsen H/S-a indaih lohna pawh hriain sorkar chuan SEDP hnuaiah zirtirtu pathum - science leh mathematics zirtirtu tur telin a dah belh a ni," a ti.

School Education Directorate tarlan danin, Lungsen H/S-ah zirlai 59 an awm a, zirtirtu pasarih an awm mek. Zirtirtu pasarih zingah a ngheta thawk pahnih chiah an awm a; pathum chu SEDP hnuaia zirtirtu niin, pakhat chu CSS hnuaia zirtirtu a ni a, pakhat dang chu MLA sum hmanga rawih a ni.

Lungsen H/S-ah zirtirtu dah belh a harsa rih tih tarlangin School Education Directorate thuchhuah chuan, hrethiam turin khawtlang mipui a ngen a, "Zirna ṭha taka a kal theihna turin sikul khar zawnga hma la lo a, zirtirtute'n an theihna zawng zawnga zirtir hna an thawh theih nana ṭawiawm tura beisei leh ngen an ni," a ti a; zirlai 59-te chu zirtirtu pasarihin ṭha taka an enkawl theih beisei a nih thu a tarlang.

Tarlan tawh angin, Lungsena Joint NGO Co-ordination Committee hmalaknain zirtirtu sawn chhuah duh lohna leh zirtirtu dah tura sorkar kar nan August 23, Thawhlehni aṭang khan Lungsen khuaa sikul zawng zawnga sikul kai tur an dang. August 26, 2022 ral hmaa thu lawmawm a awm loh chuan kar leh aṭangin na zawka hmalak an tum a ni.