Minister-in Khawzawlah SEDP a hawng

Minister of state Lalruatkima chuan nimin khan Khawzawl Zaingen YMA Hall-ah Khawzawl district-a SEDP ṭanpuina sum (family oriented SEDP) sem tur a hawng. Minister chuan, "SEDP bul ṭanna hi beitham angin lang mah se, a dawngte chhawm chhoh mai bakah, hmalakna thar neih zel tum a ni," a ti.

Lalruatkima chuan, mipui tel loin sorkar a kal thei lo tih sawiin, "Policy reng reng mipui ṭawiawmna tel loin a hlawhtling thei lo. Family oriented SEDP hi chhungkaw khai chhuahna tur leh an intodelh theihna tur mai bakah, khawtlanga hmasawnna ruhrel siamna tur pawimawh tak a ni," a ti a; SEDP a hlawhtlin theih nan mipui ṭawiawmna a ngen.

Minister chuan, SEDP kaltlangin in leh lo teh nan cheng nuai 90 pek belh a nih thu te, thlai zawrh, sâwngbàwlna leh vawn ṭhatna tur Rurban Commercial Centre (Agro Processing Centre & Warehouse) Chawngtlai leh Puilo khuaa siam mek chu kuminah hawn tum a nih thu te, PMAY Housing for All Grameen kaltlangin in sak ṭanpuina cheng vbc 41 pek chhuah ṭan a nih thu te, sorkarin Khawzawl district tan IPRO post siam phalna a tihchhuah tawh thu te, Khawzawlah Revenue surveyor dah thuai tum anih thute a sawi bawk.

SEDP hawnna inkhawmah hian Human Resource Development Board vice chairman L Thangmawia, MLA, Khawzawl DC CC Lalchhuangkima, DRDA project director Lalvenhima leh AMC councillor Lalfakzuala Chenkual te pawhin thu an sawi. Village SEDP Committee leh line department-in SEDP dawng tur an thlante hnenah cheque sem nghal a ni.