Kan thutiamah kan ding nghet dawn - ZPM Working President

ZPM working president K Sapdanga chuan August 23, Thawhlehni zan khan Khawbung Zawlbûka lawm luhna inkhawmah thu sawiin, ZPM party chu an thutiamah an din ngheh dawn thu a sawi.

K Sapdanga chuan, ZPM sorkar huna an tih tur an sawite chu lo chhinchhiah turin mipui a chah a, "Kan hmaa kal tawh party-te kal dan kan thlirin mipui hnena kan chah duh chu, keini chu kan thutiamah kan ding nghet dawn tih hi a ni. Mipuite'n kan laka beiseina sang tak an neih hi tihlawhtling turin kan theihna zawng zawngin kan thawk ang," a ti.

ZPM Working President chuan, kawng dik zawh harsa fo mah se, huai takin an kal dawn tih sawiin, "Kan ramin zan thim karah mangchhia mangin, thâwm hriat nuam lo tak takte kan hre mek. Kan mangchhia man mek ata kai harh a, kan ram siamṭha turin ZPM chuan kawng dik leh him zawhpui tumin hmalam a pan mek a ni," a ti a; ZPM unit, block, group leh member-te chu beidawng lo turin a chah.

K Sapdanga chuan, ZPM chu sawipuitu nei ve lo, hotute hmelhriat ni ve lo, party tana inhmang ve lote tan belh tlâk an ni dawn tih sawiin, "Kan ram tan hma lam pan turin policy ṭha tak mipui huapzo kan neih avang leh mi tin tan ZPM chuan thawhrimnain hma kan lak dawn avangin Zoram hi hma lam panin ke kan pênpui ngei dawn a ni," a ti.

ZPM Working President chuan, an party chu buai leh inlungrual lo angin party dangin an sawi ṭhin tih sawiin, "Pu Duha pawl, Pu Sapa pawl awmtir phêt tumin, tute emaw hmang ṭangkaiin social media lamah min bei nasa hle. Social media lama min beitu tam zawk hi mahni awmna veng unit tak ngial pawh hruai pha lo, ninhlei ve satliah mai an ni," a ti a; party dangte dâwt thu thehdarhte chu nuih liam mai mai turin mipui a chah a ni.