Zoramthari thih dan chhui dawn

Health & Family Welfare minister Dr R Lalthangliana chuan, August 18, 2022-a Civil Hospital, Aizawla Zoramthari (35) w/o Isak Malsawmsanga, Hortoki thih dan chu chhui a nih dawn thu social media-a a account-ah a tarlang.

Health Minister chuan, Zoramthari thih chungchangin amah a ṭhàwn thu tarlangin, "Ka thinlung takin pawi ka tiin, ka sún a. A kalsan tâk a pasal fanau, a chhungte zawng zawng ka tuarpui tak zet zet a ni," a ti a; Hortoki Village Council leh pawlte'n thuchhuah an siam chu an tih tur rêng nia a hriat thu a sawi.

Zoramthari thih dan chu ngun zawk leh fel zawka enfiah a nih tur thu sawiin Dr R Lalthangliana chuan, "Inthlahdahna vang emaw, dâwngdahna leh inngaihsak lohna ang chi thil thleng a awm a nih chuan, chutiang mite chungah chuan dan angin action lâk ngei a ni ang. Thil fel lo a awm a nih phawt chuan sorkarin a tih tur dik tak a ti ngei dawn a ni," a ti.