Siahaah pisa kái tur an dang; chawhnuah picketting tihtawp a ni

Siaha district-a Chakhei leh Siasi inkar kawng siam mek enkawltu PWD SDO Khotha Jothyu sawn chhuahna thupek sût phûtin nimin khan Siahaa pawl hrang hrangin sorkar pisa kai turte an dang. Sorkarin nimin vêk khan transfer order a sût avangin chawhnuah picketting tihtawp a ni.

Siaha aṭanga thu dawn danin, Siahaa páwl pathum - MTP, MChP leh Mara Students Organisation-te chuan Khotha Jothyu sawn chhuahna thupek sût (revoke) turin Mizoram sorkar an phût a; an thil phûtah sorkar aṭanga thu lawmawm an hmuh loh avangin nimin zing dar 7 aṭang khan DC office leh PWD office bakah, heng office paltlang pisa dangtea pisa kai tur an dang a ni.

Khotha Jothyu sawn chhuahna thupek chu Mizoram sorkar chuan nimin chhun khan a sût a; Siahaa pawlte pawhin an thil tih a hlawhtlin tak avangin nimin chawhnu dar 2 khan pisa kai tur an dan chu an titawp ve nghal bawk.

Pawl pathumte chuan, cheng vbc. 4.9 hmanga Chakhei-Siasi kawng, Kamlova Chhangte (Kamrul Laskar)-in a siam chu a chhe hle tih tarlangin, "Kawng chhuatte a chhiain a phut durh thei a, tlâk dannate pawh sâwi chhiat theih mai a ni," an ti a; hna chhe lutuk uluk taka vil tumtu Khotha Jothyu sawn a ni chu hriatthiam har an tih thu an sawi a ni.