Kuhva tawlh rûk PIL ngaihtuah
Dan loa Myanmar aṭanga kuhva rah tawlh luh chungchanga Vanramchhungi, Chaltlangin Gauhati High Court, Aizawl Bench-a public interest litigation (PIL) a thehluh chungchang chu nimin khan High Court judge Justice Michael Zothankhuma'n a ngaihtuah leh a, chawlhkar li hnua ngaihtuah leh tura dah a ni.
Thu dawn danin, PIL chungchangah hian CBI leh Customs lamin chhànna an thehlut tawh a, Mizoram sorkar leh sorkar laipui lamin chhanna an la thehlut thei lo thung.
Tarlan tawh angin, Myanmar lam aṭanga Mizorama dan loa kuhva rah tawlh rûk chungchangah Vanramchhuangi'n April 29, 2022 khan Gauhati High Court Aizawl Bench-ah PIL a thehlut a; High Court-in May 6, 2022-ah ngaihtuahin, thu tlingah ngaiin a pawm a, Mizoram sorkar chu insawifiah turin (PIL chhanna pe turin) chawlhkar li hun a pe a ni.
PIL chu June 9, 2022 khan High Court judge pahnih - Justice Nelson Sailo leh Justice Marli Vankung te ṭhutna Gauhati High Court Division Bench-ah ngaihtuah leh a ni a; insawifiah tura tih tawhnaah sorkar ukilte'n chhànna an la pe thei lo. Sorkar ukilte'n chhan lêtna hun chawlhkar thum chhung an dil belh angin Court chuan a phalsak.
Thu dawn danin, kuhva rah tawlh rûknaah kuhva rahte chu Mizorama thar a ni tih lantirna turin MAMCO-in certificate of origin a pek chhuah avangin Court chuan MAMCO hotute chu inlan turin a hriattir a; kuhva tawlh rûk chungchang chhui turin CBI tih an nih avangin CBI aiawhte pawh Court-ah an inlan a ngai a ni.