Aizawla dan loa in sak pathum AMC-in ṭhiah tumin hma a la mek

Aizawl Municipal Corpo­ration (AMC) chuan nimin khan AMC hnuaia technical mi - engi­neer, architect leh super­visor-te AMC Audito­rium, Ṭhuampuiah a ko khawm a; Aizawla in sak khuahkhirhna dan, AMC Building Regulation, 2012 ṭha zawka kalpui a nih theihna tura mawh­phurhnate an inhrilhfiah. Dan loa in sak pathum ṭhiat tura hmalak mek a nih thu tarlan a ni.

Sawihona hi AMC town planner Lalmuan­awma'n a kaihruai a; AMC Enforcement Commi­ttee chairman John Zosangliana Khiangte, councillor chuan, "Committee hian complaint box-a lehkha rawn lutte chak takin a bawhzui ṭhin. Vantlang tana hmuh nuam lo khawpa hnawksaka in sak hmuh tur a la awm a, dan bawhchhiate hrem turin khauh taka hmalak zel tur a ni," a ti. Enforcement Committee rawtna angin AMC-in dan loa in sak pathum chu ṭhiah tura hmalak mek a nih thu a sawi a ni.

AMC Commissioner chuan, AMC huam chhungah hre reng chunga dan bawhchhiatna a thleng foa hriat a nih thu a sawi a, "In hmun, kum tam tak kal taa kan lo neih tawhte hi a tê si a, in kan duh lian tawlh tawlh bawk si a, chu chuan harsatna tam tak a thlen a ni," a ti.

Zothanmawia chuan, Aizawla Building Regulation kalpui danah duhkhawp lohna tam tak awm mah se, National Disaster Manage­ment Authority-in Aizawl chu hma la hmasa leh hma la ṭha zingah a dah thu a sawi a; dan kenkawh chungchangah AMC leh a thawhpui engineer leh architect-te'n mawhphurhna an hlen a pawimawh thu a sawi.

In sak dil a nih aṭanga sak zawh thlengin technical mite'n mawh an phurh thu sawiin AMC Commissioner chuan, in sak ṭan a nih aṭanga sak zawh thlengin in sak vil reng a ṭul thu a sawi a; dan bawhchhiatna awm ṭhinte chu AMC Building Regulation-in a tarlan angin in neitute mai bakah, technical mite mawhphurhna a nih thu a sawi bawk.