Dubai-ah lakhuihthei thawn belh

Sialhâwk khuain an thar lakhuihthei kg. 300 chu Dubai, United Arab Emirates (UAE) leh Bahrain-a zawrh turin nimin zing khan thawn chhuah leh a ni. Ni hnih/thum hnu velah Bahrain leh Doha-ah thawn leh theih beisei a ni bawk.

Sorkar thuchhuah tarlan danin, Sialhawk lakhuihthei hi a hmaa buaipuitu Fair Exports-te'n an la leh dawn a; lakhuihthei thawnna man zawng zawng Fair Exports-in an tum dawn a, Mumbai-ah kg. khat Rs 30-in an lei ang. Dubai-a lakhuihthei thawna hralh a nih theih nana sum leh pai senso ngaite chu bialtu MLA Tawnluia, deputy chief minister-in a tumsak a ni.

Sialhawk khuaa lakhuihthei chíngtute hian kuminah lakhuihthei quintal 5,000 vel an hralh tawh a; Mizoram chhung bakah, Assam leh India ram páwnah an thawn chhuak tawh. Kuminah quintal 10,000 vel thar an inbeisei a ni.

Sorkar laipuiin ram danga thlai thar thawn chhuah turte Agricultural and Processed Food Products Export Development Authority (APEDA) kaltlanga thlawhtheihna phurh man a tumsak ṭhin chu an hmuh theih nan Sialhawk Pineapple Grower Society chuan APEDA kaltlangin Central Transport Subsidy an dil mek a, chhanna an la dawng lo.