Health Minister-in thisen pe zel turin Zoram mipui a sáwm
Health & Family Welfare minister Dr R Lalthangliana chuan, Mizoramin Covid-19 léng leh inkhàrkhip vangin nunphung pangngai awm thei lo mah se, thisen mamawhtu eng emaw zat an awm reng avangin thisen pekah inthlahdah lo a, pe chhunzawm zel turin mipui a sáwm.
Health Minister hian thisen pek chungchangah mipuite ngenna a tichhuak a, "Covid-19 hripui léng karah hian natna dang vanga damlo tam takte nunna chhan nan thisen mamawhna a la sang em em reng a, chuvangin, hripui lën chhunga thisen mamawh tlâkchham a awm loh nan theihtawp chhuaha ṭan kan lak tlân a ngai tak meuh a ni," a ti.
Dr R Lalthangliana chuan, inkhàrkhip laia thisen pek dan tura State Blood Transfusion Council-in inkaihhruaina a siamte zâwm hrâm hrâm tur leh, Covid-19 laka invênna hrang hrang sorkarin a chhuahte zâwm turin thisen pe turte leh a buaipuitute a ngen a ni.
Thisen pek chungchanga hma latu pawl Association for Voluntary Blood Donation (AVBD) hmalakna lawmawm a tih thu leh sorkar hmalakna an thláwp zel chu lawmawm a tih thu a sawi a, "AVBD an awm hi Mizoram mipui tan a thlamuanthlak hle. Damlo mamawhte tan leh nunna chhan nan hripui léng karah thisen pek i chhunzawm zel ang u," a ti.