KHAWTHLIR

Thisen pe
Public Higher Secondary School NSS chuan nimin khan Civil Hospital, Aizawl blood bank-ah thisen pek an huaihawt a, zirlai 36-in thisen an pe.

Psychiatry sawn
Civil Hospital, Aizawla rilru lam inentirna, Psychiatry OPD chu August thla tir khan Kulikawn Hospital-ah sawn a ni tawh a; Psychiatry OPD pan duh tan Kulikawn Hospital pan tur a ni.

LMC inthlan neih thuai duh
PC party chuan thuchhuah siamin, Lunglei Municipal Council (LMC) inthlan kumin chhung ngeia buatsaih an duh thu an tarlang a, "LMC hmanga Lunglei khawpui tihhmasawn nana ruahmanna thu awm tawh sa hi tisaah chantir ngei ni se tih hi kan duh dan a ni," an ti.

Sports Day
Sports, Youth Affairs, ICT & Tourism Development Board vice chairman TC Pachhunga hoin nimin khan SYS conference hall-ah sorkar, infiamna pawlte leh pawl dang aiawhte'n August 29, 2022-a National Sports Day hman dan tur an sawiho. National Sports Day chu hmang tura hriattirna a chawpchilh avangin Mizoram pum huapa hmang loin, Aizawla hmun ṭhenkhatah hman ni se, an ti.

Heroin man
Champhai police-te chuan August 23, Thawhlehni khan heroin gram 77 leh a neitua puh Chinlamtuanga (20) s/o Pianglamtung(L), Laitui, Myanmar an man. Ruihhlo hi international market-ah cheng nuai 38 man a ni.

MLA-in tlawh
Lengteng bialtu MLA L Thangmawia chuan nimin khan a bial chhunga Kawlkulh leh a chhehvela sorkar hmalakna hrang hrang a tlawh. L Thangmawia chuan, Dulte community hall sak nan sorkar laipuiah cheng nuai 418 dil mek a nih thu a sawi.

Report pawm
State Level Committee on Ground Water Resources Assessment of Mizoram chuan nimin khan Ground Water Resources Estimation of Mizoram 2022 report an pawm.