Sorkarin technical course-ah leilung fate himna a ngai pawimawh ber zel dawn - R Romawia
Higher & Technical Education (HTE) minister R Romawia chuan, Mizoram quota-a technical course hnawhkhahna turah sorkarin ram leilung fate himna a ngaih pawimawh ber zel tur thu a sawi.
R Romawia hian thuchhuah siamin, kum 2014-a Mizoram sorkar leh MZP inbiakna angin, Mizoram quota-a technical courses zir tur thlannaah ram leilung fa dik takte'n Mizoram quota an luah ngei theih nan Mizoram sorkarin The Mizoram (Selection for Higher Technical Courses) Rules 1999 chu kum 2015-ah a tihdanglam thu a tarlang.
HTE Minister tarlan danin, dan siamṭhat chu ram leilung fate him zawk nan ennawn leh a ni a, April 20, 2016 khan notification tihchhuah leh a ni. Kum 1999 Rules-in Category-I a 'Indigenous' a tih chu 'Zo-ethnic people of the state of Mizoram' tia thlak a ni a, category-II hnuaiah 'children of non-Zo ethnic people of the state of Mizoram' tih dah tel a ni.
Dan tihdanglam chu mi ṭhenkhatin High Court-ah an khin avangin Court-in hman theih rih loh turin a dang (stay) a, Court-in dan thar hman a phal tak loh avangin rules hlui hman a ngai ta a ni.
2016 Rules-a category-I hnuaia indigenous (Zo-ethnic people)-te chauh an luh theih nana sorkarin dan a siamthar chu hman theih ni lo mah se, kumin 2017-a Mizoram quota-a technical courses zir tur thlanna neih mekah Mizoram sorkarin category-I chu ram neitu Zofate kutah chauh a dah dawn niin Minister chuan a tarlang.
R Romawia chuan, all India level-a entrance exam, National Eligibility cum Entrance Test (NEET) buatsaih a nih tak avangin, Mizoram chhunga ṭhalai leh zirlaite chu quota-ah chauh innghat lo a, general
aṭanga tling thei tur khawpa taima lehzuala zirna ngai pawimawh turin a chah a; "Hun lo kal lehzel turah Mizoram quota hnawhkhahna turin sorkar chuan ram leilung fate himna a ngai pawimawh ber zel dawn a ni," a ti.