Mizoramah mi 5,669-in OST an la tawh

Mizoram State AIDS Control Society (MSACS) chuan, July 25 aṭang khan Aijal Club-ah ni hnih awh ‘State level training on OST’ batch hnihna an buatsaih a, nimin khan an zo. Mizoramah OST la tawh mi 5,669 an awm.

Training-ah hian Mizoram puma sorkar Oral/Opioid Substitution Therapy (OST) centre 13 leh NGO centre pali tel tura tih zinga mi 42 an tel a; nurse, data entry operator, project manager, doctor, field mentor leh project officer-te an ni.

A ṭanna hunah MSACS project director Dr Lalmalsawmi Sailo chuan, ruihhlo vanga harsatna neite chu mize hrang hrang nei an nih avangin an mize mila counselling uluk taka neihpui a ṭul thu a sawi a, "Ṭhenkhat chu an duhthu ni lo, chhungte nawr luihte an nih avangin lo chhum hmin a har a, beidawng loa lo tih ṭâng ṭâng a ṭul," a ti.

OST hi ruihhlo vanga harsatna neite tana HIV vênna damdawi a ni a, ruihhlo ngaite'n an ma­mawh dan azirin doctor-te'n an chawh a; damdawi chu lei hnuai chauha pek tur a nih avangin dawlh emaw, inchiu emawin a thawh tur angin a thawk lo a, a overdose (OD) theih loh tih an tarlang.

OST hi district head­quarters zawng zawng bakah, Thenzawl, Khaw­zawl, Vairengte, Lengpui leh Darlawn aṭangin pek chhuah a ni.

Report-a tarlan danin, kum 2015 aṭang khan Mizoram pumah OST la tawh mi 5,669 an awm a, treatment la zo tawh mi 730 an awm. OST la mek mi 1,722 an awm a, OST la mek zinga 292 (5.15%) chu HIV hrik pai an ni.