ṬBCC bulah lungawi lohna lantir Sorkarin dan hman lai a nei lo

Tun hnaia Ṭawngṭai Bethel Camping Centre (ṬBCC)-a awm zinga mi an thih vanga lungawi lo mi eng emaw zat chuan nimin khan ṬBCC bulah lungawi lohna an lantir. Hetih lai hian, Mizoram sorkar chuan ruihhlo ngaite enkawlna hmun (home/centre) kaihhnawihah dan hman lai a la nei lo a, dan an siam thar erawh hman theiha peih ṭêp a ni.

July 19, 2017 khan ṬBCC-a awm Lalruatfela (17) s/o. C Lalhmachhuana, Government Complex chu a thi a, a hma lawkin mi dang pakhat a thi bawk. Lalruatfela thih danah hian a chhungte leh ṭhiante chu an lungawi lo a, nimin khan ṬBCC bulah lungawi lohna, peaceful demonstration an huaihawt ta a ni.

Lungawi loh lantirnaah hian inen­kawlna ṭha nei lo home an duh loh thu te, ṬBCC-ah ei leh in ṭha leh thianghlim pek an phût thu te, a awmte hmangaih taka enkawl an phût thu te, an enkawl theih bak aia tam dah luh loh an duh thu te, inmate-te damlohna dâwt anga puh tawh lo tur leh doctor entir vat zel tura an phût thu te, medical leh sanitation lamah enfiah ṭha an tih thute an tarlang.

Thusawitute chuan, Lalruatfela thihna chu sorkar leh ṬBCC béng harhtu ni se an duh thu sawiin, "An tui tlan enfiah ni se. Mihring dikna leh chanvo hunhalh ni se. Damlo an awmin, chhuah duh vangah puh ngawt tawh lo se, na derah puh ngawt lo se. An na tak tak em tih finfiah nan doctor-te ko se," an ti a; tun dinhmunah chuan mihring dikna palzûtna a nasat thu an sawi.

ṬBCC chu tihchangtlun a, miin luhna tlaka an ngaih theih nan insiam ṭha se an duh thu te, sorkarah inziak lutin, dan hnuaiah awm ve tawh se an duh thute an sawi a ni.

ṬBCC hian tun kar tìr aṭang khan an hnena awm (inmate)-te chu a duh duh chhuah an phalsak a; July 24 leh 25 khan mi 100 chuang an chhuah tawh bakah, nimin khan mi 50 an chhuak leh a, ni thum chhungin mi 170 chuang an inla chhuak a ni. Mahni thua inla chhuakte bakah hian, damlo chhuak an awm nual bawk.

Mizoram sorkarin ruihhlo ngaite enkawlna ang chi home/centre enkawlna, kaihhruaina leh thununna kawngah dan a la nei lo a; chutih rualin, dan thar an duang tawh a, Assembly-ah pawh pass tawh a ni.
Vanglaini palai zawhna chhangin Social Welfare department director Dr Lalnunthara chuan, "Dan kan la nei lo. Tunah hian kan duang tawh a, Assembly-ah pawh pass tawh a ni a, Rules pawh siam a ni tawh a, Cabinet-in an pawm a la ngai," a ti.

Social Welfare department hotute sawi danin, ruihhlo ngaite centre/home chungchanga dan an siam thar hi, 'The Mizoram Drugs (Control Substances) Act, 2016 a ni a; Rules an siam tawh chu Law & Judicial department pawmpui turin an thawn tawh. Law & Judicial department-in an pawmpui (vetted) hnuah Cabinet-in a pawm leh a la ngai a, Cabinet-in a pawm chuan government gazette-a chhuahin hman theih a ni tawh ang.

The Mizoram Drugs (Control Substances) Act-ah hian centre/home-te inenkawl dan tur, inkaihhruaina leh khuahkhirhna turte kimchang taka ziah a ni tih an sawi. ṬBCC chungchang bikah Social Welfare Director chuan, dan mumal a la awm loh avangin an tih tur chin hriatthiam a har thu sawiin, "Kan inrawlhna chi a ni em, ni lo em tih hriatthiam a har," a ti. SWD hotute chuan, kum hmasa lamahte an lo tlawh tawh a, thurâwnte an pe a, thurâwn pek chu an tih theih chin a nih rih thu a sawi bawk.