Kar tin tui sem thei tura ṭan la turin PHE Minister-in thawktute a chah
PHE department chuan nimin khan IPR directorate auditorium-ah review meeting an nei a; PHE minister Zodintluanga Ralte chuan, thawktute chu Aizawl leh khawpui lian deuha kar tin tui thianghlim sem thei tura ṭan la turin a chah.
Zodintluanga chuan, PHE department-in hmachhawp tam tak an neih thu sawiin, "Aizawl khawpui leh khawpui lian deuhahte kar tin tui thianglim tak sem thei tura ṭan lak zel a pawimawh. Mipui tana hna thawk kan ni tih hre reng chunga theihtawp chhuah a, department dang nente pawh ṭangruala ṭha taka thawhho zel tur a ni," a ti.
PHE Minister chuan, India ramah mipui 70%-in tui thianghlim in tur an neih loh thu sawiin, "Mizoramah chuan National Rural Drinking Water Programme, central scheme leh state fund hmangin khawpui leh thingtlang khaw hrang hrangah tui thianghlim pek hna thawh mek a ni," a ti a; Aizawl leh district khawpui dangah tui a hnianghnâr zawkna atan theihtawp chhuah a nih thu a sawi.
World Bank-in a tarlan danin, India rama natna inkaichhawn theih 21% chu tui thianghlim lo leh faina kawnga hnufual vang a nih thu sawiin Zodintluanga chuan, "Tui thianghlim leh faina hi inzawm tlat, hriselna atana pawimawh tak a nih avangin PHE department hian mipuite hmasawnna atan hna pawimawh tak an thawk a ni," a ti.
PHE department hmalaknate mipuiin an hmuh theihna tur leh anmahni hnathawh thlirletna tura buatsaih Swachh Bharat Mission documentary film chu PHE Minister hian a tlangzarh nghal bawk.
Parliamentary secretary (PHE) Hmingdailova Khiangte chuan, "Tui semtu leh meter reader aṭanga a lal ber thengin rinawm taka hna thawh a pawimawh," a ti a; thawktute chu theihtawp chhuaha an zavaia Mizoram mipui tana thawk zel turin a fuih.
Meeting hi PHE secretary V Lalremthanga'n a kaihruai a; Aizawl, Kolasib leh Champhai district hnenah pawn lama inthiar awm lohna, Open Defecation Free certificate hlan a ni.
Review meeting-ah hian chawhnu lamah technical session neiin, hnathawh dan thlir-letna leh hmachhawp sawiho nan hun an hmang a; vawiinah Aijal Club-ah technical session leh sawihona hun an hmang leh ang.