Chakma-te ram dang mi an ni - MPC

MPC party chuan thuchhuah siamin, Chawngtea Chakma NGO hrang hrang ṭhukhawmin Mizoram chu hmásáng aṭanga Chakma-te ram, an lo chên ṭhin tawhnaa an puang chu pâi daih har an tih thu an tarlang a; "Mizorama Chakma-te hi ram dang mi a rûka lo lut (illegal infiltrator) an ni," an ti.

MPC chuan, "India a indan aṭanga kum 20 hnuah pawh Chakma-te hi ram dang mi an nih tlat avangin Mizorama Mizo hnam hrang hrangte zinga tel ve ngai lo leh chanvo engmah nei ngai lo an ni. Constitution siamtute pawhin Chakma[te hi foreigner an ni tih an hriat chian avangin, India rama hnam hrang hrangte zingah Chakma-te an telh lo a, Mizo hnam zingah pawh an tel hek lo," an ti a; North East Areas Re-Orgnisation Act 1971 siam a nih hma kum 20 chhungin Constitution-ah Chakma hnam hming a chuang ngai lo tih an sawi.

Kum 1947-a India independent hmaa British awpna hnuaia a awm laiin Chakma-te chu British hoin an hriat chian avangin an duh ang anga Mizorama luh an phal ngai lo tih sawiin MPC chuan, "Mizo lalte awpna hnuaiah hun eng emaw chen an khawsak ve duh pawhin dan mumal tak hnuaiah phalna an lak hmasak phawt a ngai. Mizoram (Lushai Hills) awptu Superintendent standing order no. 16 of 1928-ah Chakma-te chu foreigner an nih-zia chiang takin a hriat theih a ni," an ti.

MPC party chuan, Chakma-te chu tun hnuah Mizoram chu an ram leh khawsakna hlun anga puang tawh lo turin an chah a ni.