Scheme thar inhrilhfiahna hun buatsaih

Ministry of Food Processing Industries (MoFPI), Mizoram sorkara Commerce & Industries department leh Associated Chambers of Commerce & Industry of India (ASSOCHAM) ṭangkawp chuan, MoFPI hmalakna pahnih World Food India 2017 leh Kissan SAMPADA Yojana inhrilhfiahna hun nimin khan Hotel Regency-ah an buatsaih.

MoFPI director Jitendra Kumar chuan, kumin May thlaa Prime Minister-in a tlangzarh tâk, lo neitute tihchangtlunna atana sorkar laipuiin rua-

hmanna thar a siam, Scheme for Agro-Marine Processing & Development of Agro-Processing Clusters chungchang a sawifiah a, "Scheme atan cheng vbc. 6000 bituk a ni a, ram pumah lo neitu nuai 20 chuangin an hlâwkpui ngei beisei a ni," a ti.

Jitendra Kumar chuan, kum tin ram chhunga thlai leh thei thar chhuah hloh zat chu suma chhûtin cheng vbc. 92,000 a nih ṭhin avangin sorkar laipui-in SAMPADA hmangin thlai/thei thar chhuah leh a sawngbawlna tur atan hmalakna thui tak neih a tum tih a sawi a; scheme thupui chu ‘Farm to Fork’ tih a nih angin, thlai thar chhuah a nih aṭanga ei tura siam a nih thlengin scheme hnuaiah sorkarin ṭanpuina pek a inhuam dawn thu a sawi bawk.

NABARD general manger Rakesh Srivastava pawhin thu sawiin, "SAMPADA hnuaiah hian NABARD kutah loan pek chhuah tur cheng vbc. 2000 dah a ni. Mizoramah chuan scheme hmang hian state sorkar project bakah, sorkarin a pawmpui mimal project-te ṭanpuina pek theih a ni," a ti.

Food processing sector tihchangtlun nan sor-kar laipuiin ram chhunga thlai/thei dehchhuah leh chu'ng aṭanga ei tur siam chhuahte chu khawvel zau zawka tihlâr tumin November 3-5, 2017 chhung khian Vigyan Bhawan, New Delhi-ah ‘World Food India Summit 2017’ a buatsaih dawn. Summit-ah hian khawvel ram hrang hrang aṭanga an tel dawn bakah, India ram chhunga state hrang hrangte'n an thlai/thei dehchhuah leh siamte an pholang dawn a ni.