Mi 74,932 enfiah an ni tawh

May 1 tlai dar 5 leh May 2 tlai dar 5 inkar khan Mizorama screening point hrang hrangah state páwn aṭanga Mizorama lut tur mi 969 enfiah an ni a, chu'ngte nen chuan screening point-a enfiah tawh zat chu mi 74,932 an ni.

Hemi chhung vêk hian quarantine centre-a dah luh thar mi 484 awmin, mahni ina inkhung hrang (home quarantine) thar mi 62 an awm.

Mizorama quarantine centre-a dah tawh zawng zawng chu mi 1,142 an ni a, home quarantine tawh zat chu mi 7,152 an ni.

Mizoram aṭanga swab sample endik tawh zat chu 183 an ni a, chu'ng zinga pathum chu Inrinnia endik a ni. Niminah sample test a awm lo.

Covid-19 kai rinhlelh thila State Referral Hospital-a dah luh tawh zawng zawng chu mi 32 niin, chu'ng zinga mi pahnih chu May 2-a dah luh an ni a, Inrinnia dah luh zinga pahnih chu nimin khan chhuahtir leh nghal a ni a, tunah hian mi pakhat la awm mekin, holding ward-ah a awm mek.

Hetih lai hian, Vellore-a Mizo damlo pakhat chu State Referral Hospital-a enkawl turin nimin khan Vellore aṭangin Mizoram rawn panpui mek a nih thu, ZMC-SRH Covid-19 Bulletin, nimin tlaia tihchhuah chuan a tarlang.