Mizoram quota-a Chakma-te zir phalsak turin CNCI-in Mizoram sorkar an ngen

Chakma National Council of India (CNCI) Mizoram State Committee chuan thuchhuah siamin, Chakma NGO-te'n Mizoram quota-a Chakma zirlaite an zir phalsak turin Mizoram sorkar an ngen tih an tarlang.

Mizoram quota-a Chakmate MBBS leh BDS zirtir chungchangah Chawngtea Chakma NGO hrang hrangte chu July 24, 2017 khan CNCI Mizoram State Committee pisaah an ṭhukhawm a; Chakma zirlaite'n Mizoram quota-a MBBS leh BDS an zir theih nana hma la turin chief minister Lal Thanhawla ngen an rêl.

CNCI Mizoram chuan, Mizo zirlaite'n Chakma zirlai NEET-a tlingte Mizoram quota-a zir tura counselling neihpui an dodal chu ná an tih thu an tarlang a; Mizoram sorkar chu khua leh tuite dikna chanvo, constitutional right humhim tur te, Constitution-in a phût anga hnam tlem leh hnuaihnung zawkte humhalh turtea ngenin, India Constitution-in sakhua, ṭawng leh hnam thliar a phal loh thute an tarlang a ni.

Mizoram chu Chakmate awmna ram dik tak a nih thu leh, Chakmate chu Mizoramah ram leilung fa (indegenous people) an nih thu an tarlang bawk.