KHAWTHLIR

Rs.1,00,000 hlan
Mizoram Rural Bank Officers’ Association chuan kumin June thlaa khuarêl chhiatna tuarte chhawmdawlna turin nimin khan Central YMA-ah Rs. 1,00,000 an hlan. Mizorama tuilian leh leimin tuarte ṭanpuina atana CYMA-in vehbûr a khawn mekah Rs. 42,43,156 a lut tawh a ni.

Thisen pe
Govt. Aizawl College NSS unit chuan nimin khan an college-ah blood donation camp an huaihawt a, Aizawl Civil Hospital tan mipa 138 leh hmeichhia 49-te'n thisen unit 187 an pe. GAC hian kum 2016-17 chhung khan thisen unit 354 pein, Mizorama educational institution zinga thisen pe tam ber lawmman an lo dawng tawh a ni.

YMA Map
Central YMA hnuaia Resources Sub-Committee-in YMA Map an siam chu nimin khan CYMA office bearers room-ah CYMA president Lalbuakzuala’n an tlangzarh. YMA Map hi Mizoram kilkhâwr berah pawh Rs. 30 aia toa hralh loh tur a nih thu CYMA thuchhuah chuan a tarlang.

VLAA training
SIRDPR chuan nimin khan an conference hall-ah Village Level Administrative Assistant (VLAA)-te tan training an buatsaih a, training hawngtu DRDA project director V Lalengmawia chuan VLAA-te chu hnathawhte viltu leh a hmun awmchilhtute ber an nih avangin training-naa an zirchhuahte chu a taka practice thei tura inzir thiam hlawm ṭheuh turin a fuih. Training hian July 28, 2017 thleng a awh ang.

Zirtirtute Ni
Nimin khan Lunglei additional DC John Ṭanpuia hoin Lunglei district-a Zirtirtute Ni hman dan tur an ngaihtuah a, a huhoa hmang loin, mahni sikul ṭheuha hman turin ruahmanna an siam. Zirtirtute welfare fund atan sorkar leh private school zirtirtute'n Rs. 50 ṭheuh an thawh dawn bakah, zirlaite pawh bituk zat awm loin an remchan ang thawh ve tura ngen a ni ang.