Saitual-Saichal kawng siam nan Cheng vbc. 31.84 ruahman a ni

Lengteng bialtu MLA, L Thang­mawia chuan Inrinni khan a pisaah thuthar thehdarhtute a kâwm a, Saitual leh Saichal inkar kawng, NH-102B (km. 23.43) siam nan cheng vbc. 31.84 ruahman a nih tawh thu a sawi.

L Thangmawia chuan, Saichal-Saitual-NE Bualpui kawng km. 34.33 laih hna chu kum 2006 aṭangin North Eastern Council (NEC) sum hmanga hmalak ṭan a nih thu sawiin, "A tira sum ruahman zat chu cheng nuai 3,343 a ni. Kum 2008 khan laih zawh a ni a, Saichal-Hliappui inkar chu Mizoram PWD-in an blacktop zo tawh a, Saitual-Saichal inkar km. 23.43 chu la blacktop loh a ni," a ti.

Saitual-Hliappui kawng chu kawng pawimawh a nih thu sawiin L Thangmawia chuan, "Manipur kalna kawng a nih mai bakah, Lengteng bial khaw tam zawk leh Hnahlan tlang dung tana Aizawl panna hnai a ni. Hliappui aṭangin jeep kawnga kal hian Aizawl thlenna atan kawng danga kal aiin km. 34-in a tawi zawk a ni," a ti a, kawng chu laih tlang a nih aṭangin a lun thu a sawi.

Lengteng Bialtu MLA sawi danin, Saitual-Hliappui kawng chu a pawimawh avangin MLA a nih hnuah hma a la nghal a, PWD changtu chief minister Zoramthanga hnenah kawng siam thuai a pawimawh thu leh eng emaw harsatna a awm avangin hnathawh chhunzawm a nih tâk loh thu a thlen. CM chuan ngai pawimawhin, kawng siam a nih theih nan theihtawp a chhuahpui a ni. 

Saitual-Saichal kawng atana Mizoram PWD-te'n DPR an siam chu Transport minister TJ Lalnuntluanga nen Union minister for Road Transport Nitin Gadakari hnenah an kalpui a, a hlawhtlin mai beisei a nih laiin Lok Sabha inthlanin a nang zui a. Mizoram PWD-in DPR siam lehin, December 2019 khan sorkar laipuiah an thehlut leh a, CM Zoramthanga'n ṭum hnih union minister hnenah DO letter a thawn zui bawk.

L Thangmawia chuan, sorkar laipuiin NH-102B enkawl hna chu National Highway & Infrastructure Development Corpo­ration Ltd. (NHIDCL) kuta dah turin ruahmanna a neih thu sawiin, "NHIDCL hian hma la chhunzawmin, April 22, 2020 khan Saitual-Saichal siamna tur hian cheng vbc. 31.84 ruahman a ni a, May 1, 2020 khan e-tender an chhuah ta a ni," a ti.