Minister Dr BD Chakma bantir turin Joint NGO-in Chief Minister an ngen

Joint NGO Coordination Committee (Joint NGO) chuan nimin khan an chairman Lalbiakzuala, Central YMA president hoin chief minister Lal Thanhawla a pisaah an hmu a; minister of state Dr Buddha Dhan Chakma chu minister aṭanga bàn tura ngenna an thehlut. An ngenna hi an ngaihtuah tur thu Chief Minister chuan chuan a lo hrilh.

Joint NGO chuan Chief Minister hnenah hian Dr BD Chakma chu hnam inkara buaina chawk chhuak ṭhintu a nih thu thlenin, "Minister a nihna aṭang hian bàntir tura Chief Minister hnenah ngen ni se, tiin kan rél a. Kum 2014-a MZP-in Borapansury khua, CADC huam chhunga Zofate Chawlhbûk an sak dawn ṭum khan Dr BD Chakma hmalakna vangin MZP headquarters, Lunglei hruaitute chu chhan leh vang awm miah loin Mizoram police-in an lo man tawh a ni," an ti.

NGO-te chuan, MZP-in Zofate Chawlhbuk an sak chu Chakma mipuiin an dodal vanga Chakma NGO-te'n Borapansury MDC bye-election an boycott a, Borapansury MDC bye-election boycott tura an inhmuhkhawmah pawh Dr BD Chakma chu a puipa zinga mi a nih thu an tarlang.

Joint NGO chuan, "Minister of State-a lak luh a nih laia India Constitution hnuaia dik tak leh rinawm taka hna thawk tura intiamin, sorkar hmalakna tiṭhuanawp zawnga election boycott-tu zinga a tel kha kan ngaithiam lo hle a ni," an ti a; Dr BD Chakma chu bye-election boycott zawnga a khawsak avang leh ram leh hnam inkara inrem lohna thlen zawnga hma a lak avangin minister ni zui tlaka an ngaih loh thu an sawi.

Kum 2017-a Mizoram quota-a MBBS leh BDS zir tur thlan chungchangah, Chakma zirlai palite'n Mizote quota an chuhpuinaah pawh zirlai pawlte'n an dodal a ni tih hre rengin hma a la lui tih tarlangin Joint NGO chuan, "Amah ngei hian police-te escort-na dilpuiin, Aizawl SP hnenah phone-in ngenna a thlen a ni. Hetianga hma a lak avang hian Mizo leh Mizo an inpáwng beih chiam phah. Hei hi Dr BDChakma hmalakna vanga thil thleng a ni lo thei lo," an ti.

Joint NGO chuan, Dr BD Chakma hmalakna avangin zirlai naupang leh Mizoram police-in hliam an tawrh phah tih sawiin, "Hnam leh hnam inkara buaina thlen ṭhintuah Dr BD Chakma hi kan ngai nghet tlat a ni," an ti.

Indian Constitution hnuaia a tih tur ti lo a, a tih loh tur a tih ṭhin avangin minister of state a nihna aṭanga Dr BD Chakma ban turin Chief Minister an ngen a ni.

NGO Coordination Committee lehkhaah hian Central YMA, MUP, MZP, MHIP leh MSU president ṭheuhin hming an ziak.