Parade turte hriselna endik

Aizawla Independence Day hman dan tur ngaih­tuah­in nimin khan Aizawl DC Kannan Gopinathan hoin a pisaah official-te an ṭhukhawm a; I-Day parade-a tel turte chu doctor-te'n an hriselna dinhmun an endik tawh thu an tarlang.

Meeting-a tarlan danin, Independence Day lawmna pui ber hi Lammualah neih tur a ni a, chief minister Lal Thanhawla khuallian a ni ang. I-Day lawmnaah hian parade contingent 25 vel awm tura beisei a ni a, August 7-11 chhung Lammualah zir ṭhin tur niin, August 14-ah final rehear­sal neih tum a ni.

Ṭum danga parade con­tingent, a bikin zirlai zingah taksa chak loh vanga lu hai leh tlu an awm ṭhin avangin, chutiang harsatna chu pum­pelh a nih theih dan tur ngaihtuah a ni. Meeting hmasa lama lo rel tawh bawh­zuiin, Health & Family Wel­fare department chuan parade contingent-a tel tur sikul hrang hrang zirlaite hriselna an endik tawh a ni.