District tihpuitlin phûtna atan Saitual in tinah puanvar an zár

Saitual District Implementing Demand Committee (SDIDC) bultumin, nimin khan Saitualah Saitual district puan tawh tipuitling tura sorkar ngiatna atan Saitual khawpui chhunga in tinah puanvar zâr a ni a, July 31, 2017-ah kawng­zawh an tum.

Saitual khawpui chhunga tlawmngai pawl hrang hrang - V/C, YMA, MHIP, MUP, MZP, MSU leh SDIDC hruaitute chuan nimin khan Keifang Venghlun Branch YMA Zawlbukah joint meeting an nei a; NGO leh V/C kalkhawmte chuan, district tihpuitlin a nih theih nana sorkar karna kawngah lungrual taka ke pênho tura an inpeih thu te, an mawhphurhna ṭheuh tlanchhiatsan an tum loh thute leh, SDIDC hmalakna chu thlàwp tlat an tum thute an sawi.

Meeting chuan, Saitual district a taka tihpuitlin an duh tawhzia lantir nan leh district an beiseinaah ngenngáwl leh dawhthei tak, tharum tel loa beih zel ni se, an ti a; flag dum leh sen zar ngai lo hram turin Mizoram sorkar chu August 12, 2017 hma ngeia an thil phût tihhlawhtlinsak turin an phût.

Ruahmanna an siam dan chuan, July 31 hian Keifang, Rulchawm leh Ruallung mipuite'n Keifang Dawrkawn aṭangin chawhma dar 10-ah kawng an zawh ṭan dawn a; Saitual leh Sihfa mipuite'n PWD kâwn ṭangin dar 10-ah an zawh ṭan bawk ang. Chhimlam leh hmarlam aṭanga kawngzawhte chu SDO(C) Complex-ah intâwk khawm ang a, resolution siam an tum a ni.

Hetih lai hian, Saituala V/C pathum, Congress party unit hrang hrang, group leh block-te chuan July 25 khan joint meeting an nei a; Saitual district nawrna kal mekah SDIDC hmalakna an thláwp tlat tih entir nan, a ṭul a nih chuan seal dah pawh an ngam reng tih thuchhuah siamin an tarlang.

September 12, 2008 khan Mi­zoram sorkar (GAD) chuan noti­fication siamin, Saitual hi district headquarters atan a puang a; hemi rual hian Hnahthial leh Khawzawl chu district headquarters atan puan a ni bawk.