Sorkar hnathawkte leh tanpuina dawngtute An inlàwm tawn thiam a ngai - CM Hawla

Chief minister Lal Thanhawla chuan, sorkarin ruahmannate a hlawhtlin theihna atan sorkar hnathawkte leh ṭanpuina dawngtute an inlàwm tawn a ngaih thu a sawi.

New Secretariat Complex-a Direcotrate of Fisheries building thar a hawnnaah Chief Minister chuan, "Khua leh tuite'n sorkar hmalaknate an hlâwkpui zawk nan hlawh neia thawktute an ṭhanharh a ngai. Sorkarin hmasawnna kawng hrang hranga ruahmannaahte pawh a hlawhtlinna turin official-te leh ṭanpuina dawngtute chu thil ṭha zawk inkawhhmuh tawn a, an inlàwm tawn a ngai a ni," a ti.

Lal Thanhawla chuan, sorkar pisa thar tam tak a awm belh zel chu hmasawnna a nih thu sawiin, "Office building tharte hian a chhunga hna thawkte tan phûrna thar a pek a, an theihna leh thiamnate bakah, an

ṭhahnemngaihna thlenga a tihpun ka beisei," a ti a; sorkar hnathawkte chu an rawngbawlsak mipuite hmasawnna dâltu an ni em tih inbihchiang turin a chah.

Mizoram chu tlai chi tinreng thar theihna hmun ni mah se, hlâwkpuina tham thar chhuah dan zawn hmuh kawngah erawh

ṭan lak a la ngai nasa tih sawiin CM Hawla chuan, "Hmasawn leh ṭhan tum reng reng lo, ram leh hnam tan ṭangkai tum lo leh ṭhahnem ngaih tum lo an awm ṭhin," a ti.

Chief Minister chuan, sangha khawi chu buh leh bâla intodelhna atana pawimawh a nih thu sawiin, "Mizoramah sangha khawi theihna hmun remchang hectare 24,000-a zau a awm mah se, 20%-ah chauh sangha khawi a ni," a ti a; sangha chi thar chhuahna hmun district zawng zawnga neih, sangha dil awm sa thawm ṭhat, sangha chi a intodelh leh sangha dil siam belh ngai pawimawh a nih thu a sawi.

Fihsheries minister Dr BD Chakma pawhin, kum rei tak chhung mahni puala pisa nei loa an kual hnuah office thar an nei ta chu lawmawm a tih thu a sawi a, "District zawng zawngah phûrna thar nen hna kan thawk chhun zawm ang a, Fsheries department hnuaia hmalaknain a mamawh zualpui leh hmasawnna ruhrelte siam belh zel tum a ni," a ti.

Pisa thar hawnnaah hian minister PC Lalthanliana, State Planning Board vice chairman H Liansailova, parliamentary secretary TT Zothansanga, NIB chairman JH Roṭhuama, ZIDCO chairman Lalrobiaka leh MLA T Sangkunga te pawh an tel.

Direcotrate of Fisheries pisa building hi cheng nuai 499.8 sênga sak a ni a; chhawng ruk niin, a zau zawng chu sq.metre 1782.80 a ni.