KHAWTHLIR

CYMA-in pawi ti
Central YMA chuan, tun hnaia Ṭawngtai Bethel Camping Centre-in har-satna an tâwk chu pawi an tih thu leh, tun hnaia camp-a awm thite chhungte an tawrhpui thu an tarlang a, "CYMA chuan camp chhunga awmte enkawlna kawngah hma-sawn zawnga a kal a duhsak a, camp-in hma a sawn theih nan a ṭul anga ṭanpui a inhuam a ni," a ti.

Computer sem
Dampa bialtu MLA VL Robiaka chuan July 26, Nilaini khan a bial West Phaileng block chhunga khaw 20-a primary school leh middle school-te tan computer set leh laser printer a sem. Computer leh printer hi Ministry of Minority Affairs hnuaia Multi-Sectoral Development Programme hnuaia sum hmuh aṭanga lei a ni.

Kal phal lo
Champhai DC chuan thuchhuah siamin, Ṭiau lei, Zokhawthar a mi chu July 31, 2017 aṭangin siamṭhat hna thawh a nih dawn avangin lirthei kal phal a nih dawn loh thu a tarlang. Thupek hi sutna tihchuah a nih hma loh chuan kenkawh tur a ni.

Phaiphuleng Lenmawii
Lungduhsanga (L) thuziah lâwrkhawm 'Phaiphuleng Lenmawii' tih chu nimin khan Aizawl Press Club-ah parliamentary secretary H Zothangliana'n a tlangzarh. A ziaktu hi March 23, 2016 khan a thi tawh a, amah hriatreng nan a ṭhiante'n lehkhabu hi an buatsaih a; phek 222-a chhah niin, Rs. 150 man a ni.

CM relief fund
Mizoram Govt. Adhoc Aided High School Teachers Association (MIGAHTA) chuan mi harsa zualte ṭanpuina atan tun hnai khan Chief Minister's Relief Fund-ah Rs. 10,000 an chhung lut.

NLUP sem
Agriculture, Horticulture leh Commerce & Industries department chuan nimin khan Kawnpui Venglai YMA Hall-ah Tuirial bial chhunga NLUP third phase leh fourth phase dawngtute hnenah ṭanpuina sum an sem a, bialtu MLA Hmingdailova Khiangte in a hmanpui.